Deklarata e guximshme e Lewandowskit: Me mua në skuadër, Arsenali do të kishte thyer herët thatësirën e trofeve

Robert Lewandowski nuk ka veshur kurrë fanellën e Arsenalit, ndonëse gjatë viteve drejtuesit e klubit londinez kanë bërë përpjekje konkrete për të siguruar firmën e sulmuesit polak, siç është konfirmuar nga burime pranë klubit. Kur u vu përballë pyetjes se përse nuk vendosi asnjëherë të transferohej në “Emirates”, reagimi i tij nuk pati aspak diplomaci. Kjo përgjigje u shndërrua menjëherë në qendër të vëmendjes në rrjetet sociale, duke bërë xhiron e botës në formën e një videoje virale. Momenti u regjistrua gjatë një aktiviteti të organizuar nga “Barstool Sports”, ku i pranishëm ishte edhe Zah, një mbështetës i flaktë i skuadrës londineze. Tifozi i njohur i “Topçinjve” pati rastin të takonte yllin polak dhe të shkëmrbente disa foto me të. Menjëherë pas kësaj, një tjetër pjesëmarrës i drejtoi Lewandowskit pyetjen që shumë tifozë do të donin t’ia bënin: përse refuzoi kalimin te Arsenali, pavarësisht interesimit të vazhdueshëm të drejtuesve anglezë? Sulmuesi nuk ngurroi të kthente përgjigje, duke prekur hapur mungesën e trofeve madhorë të skuadrës nga Londra në të kaluarën: “Për shkak se unë doja të fitoja trofe”. Tifozi reagoi menjëherë duke evokuar triumfin e Arsenalit në Premier League në përfundim të edicionit 2025-26, sukses i cili i dha fund një agjërimi 22-vjeçar. Lewandowski iu përgjigj sërish me ironi: “Epo, nëse do të kisha ardhur unë, nuk do t'ju duhej të prisni kaq gjatë për një titull”. Kjo nuk përbën herën e parë që rruga e sulmuesit kryqëzohet me atë të klubit londinez. Në vitin 2014, ish-trajneri Arsène Wenger pranoi publikisht se kishte tentuar ta transferonte në kryeqytetin anglez para se ai të kalonte te Bayerni. Ndërkohë, në vitin 2022, para se të zyrtarizohej te Barcelona, emri i Arsenalit u lakua sërish si një mundësi konkrete për bomberin, i cili ishte në kërkim të një aventure të re në elitën evropiane.