Arrestimet në Zubin Potok, ish-ushtaraku: Beogradi po e instrumentalizon rastin për qëllime politike

Kryetari i Partisë Përparimtare Serbe (SNS), Millosh Vuçeviç, ka lëshuar akuza të ashpra pas ndalimit të nëntë personave të përkatësisë serbe në Zubin Potok, të cilët dyshohen për përfshirje në krime lufte. Gjatë reagimit të tij, Vuçeviç ka drejtuar gishtin ndaj kryeministrit të Kosovës, Albin Kurti, duke e fajësuar për gjoja “terror dhe frikësim” të komunitetit serb në pjesën veriore, teksa ka lëshuar edhe paralajmërime se Beogradi zyrtar nuk do të qëndrojë duarkryq përballë këtyre zhvillimeve. Në një prononcim për opinionin publik, njohësi i çështjeve të sigurisë dhe ish-ushtaraku Hafir Hoxha ka vlerësuar se koha e zgjedhur për këtë aksion policor nuk ka qenë e përshtatshme, sidomos duke marrë parasysh se në Serbi po zhvillohet fushata zgjedhore. Sipas Hoxhës, reagimi i ashpër i kreut të SNS-së dëshmon se çështja është zhvendosur qëllimisht nga sfera e drejtësisë në atë politike, duke u oruratur që operacioni të paraqitet si një formë presioni ndaj serbëve të Kosovës. Duke analizuar situatën, ai ka theksuar se hetimet dhe arrestimet për krime lufte duhet të mbështeten te faktet dhe përgjegjësia personale, pa bërë dallime në baza etnike, por ka shtuar se koha e ndërhyrjes ka mundur të menaxhohet ndryshe. “Po të isha në vend të personave zyrtarë të Kosovës për këto çështje e po të kisha mundësi taktike manevrimi, këto arrestime nuk do t'i bëja tani kur Serbia ka fushata zgjedhore”, u shpreh Hoxha, duke shtuar se retorika e Vuçeviçit është e përsëritur sa herë që autoritetet e Kosovës ndërmarrin veprime kundër veprave penale të kryera nga persona serbë. Eksperti i sigurisë vlerëson se një ngjarje me karakter rreptësisht juridik po shndërrohet në një arenë përplasjesh politike ndërmjet dy shteteve. Ai bën thirrje që të ndahet kritika ndaj metodave të operacionit nga nevoja e domosdoshme për të vënë drejtësi për krimet e luftës, duke kërkuar që përgjegjësia të mbetet individuale. Në përmbyllje, Hoxha ka sugjeruar që institucionet e Kosovës t'i koordinojnë dhe planifikojnë më mirë hapat e tyre, duke parashikuar reagimet e palës serbe dhe duke siguruar mbështetjen e aleatëve ndërkombëtarë për të pasur argumente të qëndrueshme në çdo situatë.