Zbardhet pasuria e Faruk Muqollit: Toka trashëgimi, 100 mijë euro cash të prindërve dhe detyrimet bankare

Shefi i Departamentit për Operacione në Policinë e Kosovës, Faruk Muqolli, ka dorëzuar në Agjencinë për Parandalimin e Korrupsionit formularin e rregullt për pasurinë e tij për vitin 2026. Nga dokumentacioni zyrtar rezultojnë prona të patundshme të trashëguara, dy automjete, si dhe llogari bankare e detyrime financiare. Në regjistrin e pasurive të paluajtshme, Muqolli ka paraqitur nëntë parcela toke, të gjitha të fituara përmes trashëgimisë nga prindi, të cilat kapin një sipërfaqe totale prej 28 mijë e 856 metrash katrorë. Pjesa më e madhe e kësaj sipërfaqeje i takon një are prej 26 mijë e 549 metrash katrorë, ndërsa parcelsat e tjera variojnë nga 60 deri në 396 metra katrorë, me vlerën më të lartë të regjistruar në shifrën prej 6 mijë eurosh për një tokë prej 305 metrash katrorë. Sa i përket pasurisë së luajtshme, zyrtari policor ka deklaruar dy vetura me një vlerë të kombinuar prej 9 mijë e 500 eurosh. Automjeti i parë është një model Peugeot i vitit 2021 me vlerë 5 mijë euro, i siguruar përmes një ndërrimi me makinën e mëparshme, kurse vetura e dytë është një Volkswagen i vitit 2024, i vlerësuar me 4 mijë e 500 euro dhe i blerë nga kursimet e pagës së bashkëshortes. Në seksionin e parave të gatshme, Muqolli ka pasqyruar një shumë prej 100 mijë eurosh, të ardhur nga procesi i shitblerjes së trashëgimisë, por e cila figuron në pronësi të prindërve të tij. Krahas kësaj, bashkëshortja e tij zotëron 4 mijë e 500 euro para të gatshme, të mbledhura nga kursimet e pagës dhe ndihmat financiare nga diaspora. Në rubrikën e detyrimeve ndaj institucioneve financiare, figuron një kredi e marrë në bankën TEB SH.A. më 1 korrik 2024, me një afat shlyerjeje prej 36 muajsh deri më 1 qershor 2027. Kredia është marrë me vlerë fillestare prej 5 mijë eurosh për mbylljen e një detyrimi të mëparshëm dhe për nevoja familjare, ndërsa vlera e mbetur aktuale llogaritet në 3 mijë euro, kurse shuma totale e kredisë është 4 mijë e 500 euro. Të hyrat vjetore të familjes përfshijnë pagën neto të Muqollit prej 950 eurosh përmes bankës TEB dhe një pagesë shtesë prej 825 eurosh në para të gatshme. Bashkëshortja e tij kontribuon me 3 mijë e 600 euro nga puna me orar të shkurtuar në kompaninë “Emona” dhe 6 mijë euro nga lista e pagave në NPI “Stacioni i Autobusëve” në Pejë. Të ardhurat e tjera përfshijnë 120 euro pension moshe të prindit dhe 270 euro interes bankar. Në formular nuk ka të dhëna të regjistruara për aksione në kompani, letërnjoftime vlera, kriptovaluta apo kontribute për subjekte politike. Dorëzimi i këtij deklarimi është kryer zyrtarisht në Agjencinë për Parandalimin e Korrupsionit më 30 mars 2026.