Prania e baktereve rrezikon konsumatorët: AUV bllokon shitjen dhe tërheq nga tregu mishin e pulës nga Brazili

Agjencia e Ushqimit dhe Veterinarisë (AUV) ka ndërmarrë masa urgjente duke ndaluar shitjen dhe duke urdhëruar largimin nga tregu të mishit të ngrirë të pulës të importuar nga Brazili nga kompania “Apetit SHPK”, pasi analizat kanë konfirmuar praninë e bakterit të rrezikshëm Salmonella Minnesota. Sipas njoftimit zyrtar, ky aksion vjen në kuadër të kontrolleve të jashtëzakonshme të mishit të importuar, të cilat janë urdhëruar nga Ministri i Bujqësisë, Pylltarisë dhe Zhvillimit Rural, Armend Muja. Gjatë këtyre verifikimeve, prania e bakterit u zbulua në mostrat e mishit të pulës me origjinë braziliane. Duke u mbështetur në rezultatet e laboratorit dhe në zbatim të neneve 7, 10 dhe 15 të Ligjit Nr. 08/L-120 për Ushqim, AUV ka vendosur bllokimin e përkohshëm të qarkullimit, vendosjen nën mbikëqyrje zyrtare dhe tërheqjen e menjëhershme të këtyre produkteve nga tregu. Produktet që preken nga ky vendim përfshijnë markën Coopavel (Brazil, SIF 3887, LOT R-14427) dhe Superfrango (Brazil, SIF 3404, LOT R20598). Ekspertët shpjegojnë se Salmonella Minnesota është një serotip patogjen i bakterit Salmonella enterica, i cili përbën rrezik serioz për shëndetin publik. Ky mikroorganizëm mund të provokojë infeksione gastrointestinale përmes konsumit të produkteve të kontaminuara ose gjatë procesit të përgatitjes së mishit. Në përputhje të plotë me legjislacionin në fuqi, zbulimi i këtij patogjeni kërkon reagim të menjëhershëm dhe masa mbrojtëse për sigurinë e qytetarëve. Në fund, AUV u ka bërë thirrje konsumatorëve që nëse i kanë blerë këto produkte me numrat e specifikuar të LOT-it, të shmangin konsumimin e tyre dhe t'i kthejnë mbrapsht në pikat ku i kanë blerë. Ndërkohë, autoritetet theksojnë se inspektimet e jashtëzakonshme po vijojnë intensivisht për të gjurmuar të gjithë sasinë e importuar, duke nisur nga pika e hyrjes në vend deri te rrjeti i shpërndarjes, duke kontrolluar datat, certifikatat dhe kushtet e ruajtjes.