Vendim i Gjykatës Supreme: Policia nuk mund ta mbajë patentë-shoferin më shumë se tetë ditë

Gjykata Supreme e Kosovës ka marrë një vendim të rëndësishëm duke shpallur të paligjshëm dhe duke shfuqizuar paragrafin 3 të nenit 17 të Udhëzimit Administrativ të Ministrisë së Punëve të Brendshme Nr. 05/2023 për Procedurat e Kundërvajtjes. Ky paragraf parashikonte që leja e drejtimit mund t'i kthehej qytetarit vetëm pasi të kishte përfunduar plotësisht masa mbrojtëse e ndalimit të drejtimit të automjetit. Kjo betejë ligjore ka ardhur pas një padie të ngritur nga 28 paditës kundër Ministrisë së Punëve të Brendshme dhe Policisë së Kosovës. Kolegji kompetent i Gjykatës Supreme ka shqyrtuar konfliktin administrativ dhe ka aprovuar pjesërisht kërkesëpadinë, duke rrëzuar kështu pjesërisht aktin nënligjor normativ në fjalë. Në arsyetimin e gjykatës theksohet se konfiskimi i përkohshëm i patentë-shoferit nga ana e policiei dhe masa mbrojtëse e ndalimit të drejtimit janë dy kategori juridike plotësisht të ndryshme, të cilat nuk duhet të ngatërrohen gjatë praktikës së përditshme të zbatimit të ligjit. Duke u bazuar në nenin 244 të Ligjit Nr. 08/L-186 për Rregullat e Trafikut Rrugor, institucioni i drejtësisë ka konkluduar se mbajtja e lejes së drejtimit nga uniformat blu nuk guxon të tejkalojë afatin prej tetë ditësh. Për pasojë, kushtëzimi i marrjes së këtij dokumenti me përfundimin e masës mbrojtëse – e cila mund të zgjasë nga tre, gjashtë e deri në dymbëdhjetë muaj – përbën një shkelje të hapur të ligjit. Sipas qëndrimit zyrtar të Gjykatës Supreme, një akt nënligjor nuk ka fuqi që të zgjerojë kompetencat e përcaktuara shprehimisht me ligj, e aq më pak të vendosë kufizime shtesë që nuk mbështeten mbi ndonjë bazë të qartë ligjore. Në të njëjtën kohë, gjykata ka hedhur poshtë si të pathemeltë kërkesën për shfuqizimin e paragrafëve 1 dhe 2 të po këtij neni. Ajo ka vlerësuar se këto dispozita kanë thjesht natyrë procedurale dhe organizative, pasi ato përcaktojnë qartësisht se cila njësi policore është përgjegjëse për ruajtjen e dokumentit dhe detyrimin për t'i lëshuar qytetarit një vërtetim zyrtar për marrjen e përkohshme të patentë-shoferit, pa i kaluar kurrsesi kufijtë e autorizimeve ligjore.