Kryediplomatja e BE-së, Kaja Kallas, zbulon metodat e vjetra sovjetike që Kremlini po i zbaton edhe sot

Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, ka vënë në pah vazhdimësinë e qasjes tradicionale sovjetike në strategjinë që administrata e Vladimir Putin po ndjek ndaj botës perëndimore. Në një analizë të bërë publike së fundmi, ajo ka renditur tri shtyllat kryesore mbi të cilat mbështetet veprimi i Moskës sot: ngritjen e pretendimeve për pasuri apo territore që nuk i takojnë, përdorimin e ultimatumeve dhe kërcënimeve për të shtuar trysninë, si dhe llogaritjen se në Perëndim herët a vonë do të gjendet dikush i gatshëm për kompromise. Sipas Kallas, faza e parë e këtij skenari lidhet me kërkesat e pandërprera për avantazhe apo zona influence që nuk kanë qenë kurrë pjesë e juridiksionit rus. Më pas, ky presion kanalizohet përmes gjuhës së ultimatumeve dhe kanosjeve direkte, me qëllim që kundërshtarët të thyhen psikologjikisht dhe politikisht. Sipas shefes së diplomacisë evropiane, faza përmbyllëse është ajo e pritjes strategjike. Kremlini llogarit me siguri se në strukturat perëndimore gjithmonë do të shfaqen figura apo zëra që do t'i dhurojnë Moskës lëshime që ajo nuk ka mundur t'i sigurojë më parë me mjete të tjera. “Gjithmonë do të ketë njerëz në Perëndim të gatshëm të të ofrojnë diçka që më parë nuk e ke pasur”, ka qenë ky mesazhi i qartë i përcjellë prej saj. Përmes këtij alarmi, Kallas ka tërhequr vëmendjen ndaj rrezikut real që toleranca dhe lëshimet e herëpashershme ndaj orekseve dhe kërcënimeve ruse të inkurajojnë kërkesa edhe më të rrezikshme në të ardhmen.