Triumf historik i korit “Siparantum” në Mal të Zi, rrëmbejnë tri çmime prestigjioze

Kori i njohur nga Kosova, “Siparantum”, ka shkëlqyer edhe një herë në arenën ndërkombëtare, duke u kurorëzuar me tri çmime të rëndësishme në edicionin e sivjetmë të Festivalit Ndërkombëtar të Koreve, i cili u mbajt në Herceg Novi të Malit të Zi. Në kuadër të ngjarjes kulturore që u zhvillua mbrëmë në “Park Hall”, ansambli kosovar pati një paraqitje të jashtëzakonshme. Konkretisht, në kategorinë C2 për kore të përziera, “Siparantum” u radhit i pari me 97 pikë, duke lënë pas konkurrentët nga Serbia dhe Mali i Zi, si dhe duke u shpallur fitues absolut i kësaj kategorie. Krahas suksesit kryesor, juria profesionale e festivalit vlerësoi lart edhe aspektin artistik të korit, duke i ndarë çmimin për “Interpretimin e Jashtëzakonshëm në Kompozim Bashkëkohor”. Ndërkaq, suksesi u plotësua edhe në nivelin individual, ku udhëheqësi artistik dhe dirigjenti Memli Kelmendi u nderua me titullin “Dirigjenti më Premtues”. Ky triumf i trefishtë ka marrë vëmendje edhe në rrafshin institucional. Kryeministri në detyrë, Albin Kurti, ka reaguar menjëherë përmes një postimi publik, ku ka përgëzuar formacionin muzikor për këtë arritje të jashtëzakonshme dhe për mënyrën se e kanë lartësuar emrin dhe kulturën e Kosovës në skenën ndërkombëtare.