Durmishi nga Prishtina: Bizneset e udhëhequra nga gratë, motor kyç për ekonominë rajonale dhe integrimin evropian

Ministri i Ekonomisë dhe Punës, Besar Durmishi, mori pjesë sot në Prishtinë në punimet e konferencës rajonale “SHE RISES REGIONAL 2026”. Gjatë fjalës së tij në panelin e dedikuar fuqizimit të sipërmarrësisë femërore përmes partneritetit ekonomik rajonal dhe perspektivës evropiane, ai solli në vëmendje nismat qeveritare për mbështetjen e grave në biznes, ngritjen e konkurrueshmërisë dhe hapjen e horizonteve të reja të bashkëpunimit në rajon. Duke marrë fjalën, kreu i Minsitrisë së Ekonomisë dhe Punës vuri në dukje se kyçja aktive e grave në ekonomi paraqet një gurthemel për zhvillim afatgjatë, prodhimtari më të lartë dhe shfrytëzim optimal të burimeve mbarërajonale. “Sipërmarrësia e grave nuk përfaqëson thjesht një parim të barazisë, por një shtyllë të fuqishme të zgjerimit ekonomik, investimeve dhe aftësisë konkurruese. Obligimi ynë është të ndërtojmë ambientin e duhur që gratë jo vetëm të hapin biznese, por t'i shndërrojnë ato në ndërmarrje të suksesshme, të cilat investojnë, eksportojnë dhe gjenerojnë vende të reja pune”, u shpreh ndër të tjera Durmishi. Më tej, ministri ndau detaje mbi fondet e ndara gjatë vitit 2026 përmes Programit për Zhvillimin e Sipërmarrësisë dhe Konkurrueshmërisë, ku janë vënë në dispozicion 11,34 milionë denarë për ndërmarrjet mikro, të vogla e të mesme, si dhe për zejtarët. Kjo masë siguron bashkëfinancim deri në 40 për qind të shpenzimeve për pajisje e makineri të reja, respektivisht deri në 200.000 denarë për çdo përfitues. Po ashtu, janë akorduar 2 milionë denarë për implementimin e standardeve globale në sektorin përpunues, me mbështetje që mbulon deri në 70 për qind të shpenzimeve, si dhe 5 milionë denarë të destinuara për nisma të përbashkëta mes bizneseve dhe akademisë, me synim nxitjen e inovacionit dhe përparimin teknologjik. Durmishi bëri të ditur gjithashtu se përmes Planit Operativ për Punësim për vitin 2026, i cili kap vlerën e 2,39 miliardë denarëve, ofrohet mbështetje për vetëpunësimin, sipërmarrësinë dhe trajnimin për aftësi të reja, duke i dhënë përparësi gjinisë femërore. Gjatë kësaj konference, vëmendje e veçantë iu kushtua mundësive konkrete për integrimin e kompanive të drejtuara nga gratë në rrjetet e furnizimit të korporatave të mëdha ndërkombëtare dhe investitorëve të huaj. Në fjalën e tij, ministri vlerësoi se Maqedonia e Veriut poseduje një infrastrukturë të rëndësishme industriale dhe atraktivitet për kapitalin e huaj, mirëpo hapi i radhës duhet të jetë lidhja më e ngushtë e prodhuesve vendorë me tregjet globale dhe zinxhirët ndërkombëtarë të eksportit.