Tragjedia paralajmëruese: Denoncimi i armës në korrik u la në harresë, pas vrasjes u zbulua brenda shtëpisë

Më 10 korrik, Arlinda Zekaj iu drejtua organeve të rendit në Stacionin Policor të Pejës, duke njoftuar se ish-bashkëshorti i saj, Jeton Sylaj, zotëronte një armë zjarri me leje dhe se ajo ishte e frikësuar për jetën e saj. Sipas dokumentacionit zyrtar nga Zyra e Kryeprokurorit të Shtetit, ky alarm kaloi pa u verifikuar fare, ndërkohë që pas ndodhjes së krimit të rëndë, një armë u gjet pikërisht brenda banesës së tij. Gjatë dëshmisë së saj të dhënë në mes të muajit korrik, Arlinda Zekaj deklaroi se Jeton Sylaj e kishte dëbuar nga banesa dhe e kishte kërcënuar me jetë. Duke folur rreth mjetit luftarak, ajo pati pohuar: “Po Jetoni posedon armë zjarri me leje. Jo asnjëherë nuk më ka kërcënuar me armë. Nuk e di ku ndodhet arma. Po shumë e ndjej veten të rrezikuar nga Jetoni.” Referuar të dhënave të Inspektoratit Policor të Kosovës, hetuesi Qëndrim Sheremeti kishte vënë në dijeni prokuroren kujdestare, Sadije Muriqi, rreth deklarimeve të viktimës, por autoritetet nuk ndërmorën asnjë hap praktik për çështjen e armës. “Përkundër kësaj lidhur me deklarimin se i dyshuari posedon armë, nuk ishte ndërmarrë ndonjë veprim konkret për sekuestrimin e armës”, theksohet në dokumentin e IPK-së. Ersan Qavolli, i cili mban detyrën e koordinatorit nacional për dhunën në familje në Zyrën e Kryeprokurorit të Shtetit, ka bërë të meputur se arma nuk u kontrollua kurrë përmes sistemeve zyrtare e as në pronën e Jeton Sylajt. Sipas tij, për këtë situatë ishte e informuar edhe kryeprokurorja e Pejës. “Nga kjo vërehet se çështja e armës së përmendur nga viktima nuk është trajtuar, nuk verifikuar fillimisht përmes sistemit nëse Jeton Sylaj posedon armë me leje, nuk është verifikuar në shtëpinë e tij nëse ka armë në shtëpi dhe çështje të tjera me rëndësi, e që pas rastit kritik rezulton se në shtëpinë e Jeton Sylaj është gjetur armë. Për të gjitha këto rrethana ka qenë e njohur edhe Kryeprokurorja e Prokurorisë Themelore në Pejë Lumturije Vuçetaj.” Në bazë të Ligjit për armët, rastet e dhunës në familje dhe nisja e hetimeve penale paraqesin rrezikshmëri për sigurinë publike, çka shërben si bazë ligjore për marrjen e armës dhe shfuqizimin e lejes përkatëse. Ndaj Jeton Sylajt kishte nisur një procedurë hetimore për kanosje që prej muajit korrik, ndërsa më 23 tetor u ngrit edhe aktakuza zyrtare. Dokumentet nuk specifikojnë nëse arma e zbuluar pas ngjarjes kishte ndonjë lidhje direkte me vrasjen. Si i dyshuar kryesor për vrasjen e Arlinda Zekajt po mbahet kunati i saj, Albert Sylaj, i cili, sipas të dhënave të kryeprokurores së Pejës, e kishte goditur viktimën me një mjet të fortë. “Po ashtu vlerësoj se pavarësisht se arma është raportuar në muajin Korrik 2026, ka qenë dashur që të bëhet një verifikim për këtë armë”, ka përmbyllur deklarimin e tij koordinatori nacional.