Zbardhen arsyet: Pse u pezullua zëvendëskryeprokurorja e Pejës pas tragjedisë në Vitomiricë

Këshilli Prokurorial i Kosovës (KPK) ka bërë publike arsyet e plota që çuan në largimin e përkohshëm nga puna të zëvendëskryeprokurores së Prokurorisë Themelore në Pejë, Arlinda Nallbani-Gacaferri, e cila mbante edhe postin e koordinatores për rastet e dhunës në familje. Sipas dokumentit zyrtar të vendimit, prokurorja ka qenë në dijeni se më 22 tetor 2026 është bërë shkelje e urdhrit mbrojtës për viktimën Arlinda Zekaj, pasi në banesën e saj ndodheshin individë të tjerë, mes të cilëve edhe Albert Sylaj, person i dyshuar tashmë për vrasjen e saj. Në dosje theksohet se Policia e Kosovës e kishte vënë në dijeni prokuroren për këtë ngjarje. Gjatë procesit të intervistimit, vetë Arlinda Zekaj kishte treguar se Albert Sylaj i ishte drejtuar me fjalë kanosëse, duke i thënë: “Largomu, largomu se të mys”. Pavarësisht kësaj, sipas KPK-së, Nallbani-Gacaferri kishte dhënë udhëzim që Sylaj të merrej në pyetje vetëm si dëshmitar, duke shmangur trajtimin e kërcënimit direkt si një rrezik potencial që kërkonte vlerësim të menjëhershëm të sigurisë për viktimën. Organi qeverisës i prokurorisë vlerëson se prokurorja, edhe pse e njohur me kërkesat urgjente dhe nivelin e lartë të rrezikut që i kanosej Arlinda Zekaj, dështoi të ndërmarrë hapat e domosdoshëm ligjorë për t'i siguruar mbrojtjen e duhur. Gjithashtu, në arsyetim nënvizohet se ajo ka anashkaluar provat dhe faktet gjatë menaxhimit të situatës, duke rënë ndesh me standardet e larta të profesionalizmit dhe përgjegjësisë që kërkon detyra. Kujtojmë se më 29 tetor, KPK-ja ndërmori masa disiplinore duke pezulluar edhe kryeprokuroren e Pejës, Lumturije Vuçetaj, ndërkohë që në të njëjtën ditë u mor vendimi për suspendimin e 11 zyrtarëve policorë me përgjegjësi komanduese në këtë qytet. Zhvillimet e bujshme vijuan edhe më 30 tetor, kur kryeministri Albin Kurti njoftoi se ka pranuar dorëheqjen e drejtorit të Përgjithshëm të Policisë së Kosovës, Gazmend Hoxha. Të gjitha këto lëvizje institucionale erdhën si reagim pas vrasjes tronditëse të 49-vjeçares Arlinda Zekaj, ngjarje kjo e regjistruar më 25 tetor në fshatin Vitomiricë të Pejës.