Tragjedia e Pejës: KPK zbardh arsyet e shkarkimit të Vuçetajt dhe Nallbani-Gacaferrit pas vrasjes së Arlinda Zekajt

Këshilli Prokurorial i Kosovës (KPK) ka ndërmarrë masa ndëshkimore duke pezulluar nga detyra kryeprokuroren e Prokurorisë Themelore në Pejë, Lumturije Vuçetaj, si dhe prokuroren Arlinda Nallbani-Gacaferri, e cila ishte ngarkuar me trajtimin e dosjes së Arlinda Zekajt, 49-vjeçares që u vra tragjikisht më 25 tetor. Krahas suspendimit, ndaj të dy zyrtareve të drejtësisë është iniciuar procedura disiplinore, ndërkohë që KPK-ja ka themeluar një panel të posaçëm hetimor për të zbardhur plotësisht rrethanat e këtij rasti. Në dokumentin e arsyetimit të publikuar nga KPK, thuhet se kryeprokurorja Vuçetaj ishte vënë në dijeni në mënyrë të vazhdueshme nga vetë viktima A.Z., e cila përmes kërkesave urgjente kishte alarmuar se i rrezikohej jeta. Vuçetaj kishte pasur në dispozicion raportet e prokurorëve të tjerë, shkresat zyrtare të Policisë për shkallën e lartë të rrezikshmërisë, si dhe udhëzimet e drejtpërdrejta nga KPK-ja, kryesuesi Arian Gashi dhe Zyra e Kryeprokurorit të Shtetit për të vepruar me urgjencë. Megjithatë, sipas Këshillit, ajo nuk ndërmori veprimet e duhura ligjore dhe nënçmoi seriozitetin e situatës, duke bërë që neglizhenca e saj të rezultojë me pasoja fatale për të ndjerën. Në anën tjetër, sa i përket zëvendësprokurores Arlinda Nallbani-Gacaferri, KPK thekson se më 22 tetor, kur Policia kishte raportuar shkeljen e urdhërmbrojtjes nga ana e bashkëshortit dhe kanosjen ndaj Arlinda Zekajt, ajo kishte urdhëruar që i dyshuari A.S. të merrej në pyetje vetëm si dëshmitar. Prokurorja kishte anashkaluar kërcënimin direkt me jetë dhe nuk kishte matur rrezikun real që i kanosej viktimës, pavarësisht se ajo mbante edhe funksionin e Koordinatores për Dhunë në Familje. Sipas KPK-së, Nallbani-Gacaferri ka dështuar sistematikisht në përmbushjen e detyrave ligjore, duke shpërfillur provat, faktet dhe thirrjet e vazhdueshme të viktimës për mbrojtjen e jetës dhe sigurisë së saj fizike gjatë kohës që ka vepruar si prokurore kujdestare.