Revolucioni te Barcelona: Synohet Harry Kane, tre yje në shitje për 150 milionë euro

Klubi i Barcelonës po përgatit ndryshime rrënjësore për dritaren e ardhshme të transferimeve, me qëllimin kryesor për të afruar në radhët e veta një sulmues të klasit botëror. Sipas burimeve pranë klubit, drejtuesit e skuadrës katalanase po analizojnë seriozisht mundësinë e heqjes dorë nga tre futbollistë kyçë: Gavi, Alejandro Balde dhe Frenkie de Jong. Drejtori sportiv i klubit, Deco, synon të arkëtojë afërsisht 150 milionë euro nga ky operacion, fonde këto që do të përdoreshin drejtpërdrejt për të financuar blerjen e një sulmuesi të fuqishëm për repartin e avancuar. Në tregun aktual, vlera e Gavit llogaritet rreth 50 milionë euro, ajo e mbrojtësit Alejandro Balde kurohet në 40 milionë euro, ndërsa mesfushori holandez Frenkie de Jong kap shifrën e 60 milionë eurove. Shitja e këtij treshit do t'i siguronte saktësisht arkës blaugrana shumën e synuar. Shënjestra kryesore për sulmin është anglezi Harry Kane. Snajperi i Bayern Munich pëlqehet jashtëzakonisht shumë nga shtabi teknik dhe drejtuesit, të cilët ëndërrojnë ta shohin atë të veshur me fanellën e klubit në stadiumin “Camp Nou”. Megjithatë, lëvizjet e katalanasve do të kushtëzohen nga e ardhmja e lojtarit; nëse Kane vendos të zgjasë bashkëpunimin e tij me gjigantët bavarezë, kontrata e të cilëve skadon në qershor të vitit 2027, atëherë Barcelona nuk do të ndërmarrë hapa konkretë. Vlen të theksohet se gjatë merkatos së verës së shkuar, drejtuesit spanjollë provuan të transferonin edhe argjentinasin Julián Álvarez nga radhët e Atlético Madrid, por operacioni dështoi pasi klubi madrilen refuzoi kategorikisht çdo mundësi shitjeje për sulmuesin e tyre.