Ndërprerje totale e fluturimeve në Aeroportin e Napolit për gjithë nëntorin: Ja ku do të ridrejtohen udhëtarët

Aeroporti i Napolit do të pezullojë plotësisht aktivitetin e tij përgjatë gjithë muajit nëntor, për shkak të nisjes së punimeve intensive të infrastrukturës. Mbyllja e dyerve vjen si domosdoshmëri për të realizuar ndërhyrje të gjera rinovimi në pistë dhe në rrugët lidhëse të taksive, me qëllim rritjen e sigurisë, besueshmërisë dhe garantimin e vazhdimësisë operative afatgjatë të këtij nyje kyç transporti. Projektbuxheti prej rreth 30 milionë eurosh përfshin gjithashtu zëvendësimin rrënjësor dhe modernizimin e sistemeve të ndriçimit të ndihmave vizuale (AVL). Këtu hyjnë ndriçimi i pistës dhe rrugëve të taksisë, si dhe sistemet e sinjalizimit të ndriçuar, të cilat janë jetike për orientimin e avionëve gjatë fazave të ngritjes, uljes dhe lëvizjes në tokë, veçanërisht në kushte me dukshmëri të ulët. Ndërhyrja është planifikuar në periudhën kur fluksi i udhëtimeve është dukshëm më i ulët krahasuar me muajt e pikut turistik. Për të shmangur sa më shumë vonesat dhe për të shkurtuar kohëzgjatjen e bllokimit, punimet do të zhvillohen pa ndërprerje, 24 orë në ditë, shtatë ditë në javë. Si pasojë e kësaj mbylljeje, disa kompani ajrore kanë marrë masa për të zhvendosur operacionet e tyre drejt aeroporteve fqinje, konkretisht atij të Salernos, Costa d’Amalfi dhe Cilento, për t'u shërbyer pasagjerëve që synojnë këtë rajon. Në këto aeroporte alternative, fluturimet do të sigurohen nga operatorë të njohur si Ryanair, easyJet dhe Vueling, duke mbuluar linja të brendshme drejt Bergamos, Milano Malpensa, Milano Linate, Xhenovas, Torinos dhe Triestes. Ndërkohë, lidhjet ndërkombëtare do të operojnë drejt destinacioneve si Amsterdami, Barcelona, Kazablanka, Dubai, Dyseldorfi, Madridi, Parisi, Sharm el-Sheikh dhe Shtutgarti. Për të zbutur ndikimin e mbylljes së Aeroportit të Napolit, autoritetet kanë parashikuar linja shtesë autobusësh që do të qarkullojnë gjatë gjithë nëntorit mes Piazza Garibaldi në Napoli dhe Aeroportit të Salernos. Njëkohësisht, frekuencat e shërbimeve drejt stacionit hekurudhor të Salernos do të shtohen, ndërsa linjat ekzistuese drejt Potenzës, Ebolit, Battipaglias dhe Bregut të Amalfit do të vijojnë normalisht punën e tyre. Për udhëtarët që preferojnë të mos përdorin transportin publik, është vënë në dispozicion si provë edhe një shërbim taksish të përbashkëta me tarifë fikse. Ky shërbim do të operojë në dy itinerare: nga Aeroporti i Salernos drejt stacionit hekurudhor Qendror të Napolit, dhe nga Aeroporti i Salernos drejt stacionit hekurudhor Qendror të Salernos.