Takimi Kurti-Hamza, kreu i PDK-së zbardh detajet e bisedës dhe çështjet kyçe në tavolinë

Kryetari i Partisë Demokratike të Kosovës (PDK), Bedri Hamza, ka thyer heshtjen duke zbuluar detaje nga takimi i zhvilluar të dielën me kryeministrin Albin Kurti. Në një prononcim për media dhënë para nisjes së seancës plenare, Hamza bëri të ditur se në fokus të bisedës kanë qenë zhvillimet aktuale politike në vend, ku veçmas janë trajtuar projektligji për Dhomat e Specializuara dhe çështja e zgjedhjes së presidentit. I pyetur nëse është folur për ndonjë kandidaturë të mundshme për kreun e shtetit, kreu i PDK-së ka mohuar që të jenë diskutuar emra konkretë. Sa i përket miratimit të projektligjit për Dhomat e Specializuara në Hagë, ai e ka cilësuar këtë çështje si prioritet absolut për subjektin e tij politik. Hamza ka nënvizuar se zhbllokimi i kësaj çështjeje është parakusht që partia e tij të hyjë në bisedime për tema të tjera, përfshirë edhe procesin e zgjedhjes së presidentit të ardhshëm. Megjithatë, ai ka sqaruar se ky qëndrim nuk përbën një kushtëzim rigoroz, por përfaqëson një domosdoshmëri për situatën aktuale në të cilën ndodhet vendi. “Prioritet projektligji për Dhomat e Specializuara… Nëse kalohet ligji, këtë nuk po e them si detyrim, po e them si nevojë, nëse kalohet, jemi të hapur me diskutu temat tjera. Nëse nuk kalohet, nuk kemi temë më të rëndësishme se kjo”, ka deklaruar Hamza.