Shpërthime dhe alarm ushtarak në jug të Iranit: Pretendohen sulme amerikane ndaj Gardës Revolucionare pranë Hormuzit

Aktivitet i dendur ushtarak dhe goditje ajrore janë raportuar gjatë orëve të fundit në jug të Iranit. Sipas informacioneve të para, objektivi i një sulmi të supozuar amerikan ka qenë një bazë për lëshimin e raketave e Gardës Revolucionare Islamike (IRGC) në ishullin Qeshm. Paralelisht me këtë ngjarje, mediat vendase kanë sinjalizuar shpërthime të njëpasnjëshme dhe aktivizim të menjëhershëm të mbrojtjes kundërajrore në rajonin strategjik të Ngushticës së Hormuzit. Detaje të tjera nga terreni bëjnë me dije se detonime janë dëgjuar menjëherë pas mesnatës në afërsi të aeroportit Bandar-e Jask, zonë e pozicionuar gjithashtu në pjesën jugore të territorit iranian. Për momentin, nuk janë dhënë të dhëna të mëtejshme lidhur me rrethanat e sakta të këtij incidenti. Nga ana tjetër, agjencia mediatike iraniane 'Tasnim' njoftoi se forcat e Gardës Revolucionare kanë diktuar një avion luftarak armiqësor mbi hapësirën ajrore të ishullit Qeshm, duke e detyruar atë të largohet nga zona. Ndërkohë, sipas agjencisë së lajmeve 'Fars', shpërthimet e dëgjuara në afërsi të Ngushticës së Hormuzit kanë ardhur si pasojë e lëshimit të raketave tokë-ajër nga mbrojtja vendase, me qëllim goditjen e mjeteve fluturuese ushtarake të Shteteve të Bashkuara. Deri në këto momente, raportimet për goditjet e kryera nga SHBA-ja nuk janë konfirmuar nga burime të pavarura ndërkombëtare. Po ashtu, mbetet ende e paqartë nëse nga këto incidente ka pasur të lënduar, viktima apo dëme materiale.