Cenim rekord i sigurisë në financat digjitale: Binance preket nga një sulm kibernetik prej 6.3 miliardë dollarësh

Bursa më e madhe e tregtimit të kriptomonedhave në botë për nga vëllimi ditor, Binance, ka njoftuar se ka rënë pre e një goditjeje masive kibernetike, ku janë prekur rreth 6.3 miliardë dollarë (5.5 miliardë euro). Për të parandaluar një vjedhje përmasash edhe më të mëdha, kompania ka arritur të ngrijë afërsisht gjysmën e kësaj shume. Përmes një sërë deklaratash në rrjetin social X, drejtuesit e platformës dhanë mesazhe pjesërisht kontradiktore, ku nga njëra anë insistonin se "fondet e përdoruesve janë plotësisht të sigurta", ndërsa nga ana tjetër zotoheshin se do të "mbulonin të gjitha humbjet". Më vonë, përmes llogarisë zyrtare për Amerikën Latine, kompania konfirmoi se dëmi i përgjithshëm i vlerësuar shkon në rreth 6.3 miliardë dollarë (5.5 miliardë euro). "Ne kemi punuar me partnerë të blockchain për të ngrirë asetet e prekura, me rreth 3 miliardë dollarë (2.6 miliardë euro) të ngrira deri më tani", bëri të ditur platforma. Ky sulm kalon me më shumë se katër herë ngjarjen më të madhe kibernetike të këtij lloji të regjistruar deri më sot, ku platformës Bybit i u vodhën 1.5 miliardë dollarë (1.3 miliardë euro) në shkurt të vitit të kaluar, në një aksion që iu atribuua hakerëve të lidhur me Korenë e Veriut. Si masë mbrojtëse, rreth orës 00:30 GMT (02:30 CEST) të së premtes, Binance njoftoi se të gjitha depozitat dhe tërheqjet u "pezulluan përkohësisht ndërsa ekipi ynë kryen kontrolle sigurie, ngrin fondet dhe punon me zbatimin e ligjit". Kompania paralajmëroi se kjo shifër mund të ndryshojë teksa vazhdon bashkëpunimi me organet e rendit, emetuesit e monedhave, firmat e inteligjencës blockchain dhe partnerët e industrisë për të gjurmuar e bllokuar asete shtesë. Sipas verifikimeve fillestare, hyrja e paautorizuar ka ardhur si pasojë e kompromentimit të një komputeri portativ të një inxhinieri të sektorit "DevOps". Kjo u ka mundësuar hakerëve të depërtojnë në një "kontejner shërbimi" dhe të ekzekutojnë transaksione tërheqjeje të paligjshme. Pavarësisht kësaj, Binance sqaroi se "nuk kemi gjetur asnjë provë për ndonjë rrjedhje të çelësave privatë nga portofolet", duke premtuar publikimin e një analize të detajuar teknike pasi hetimi të përfundojë plotësisht. Evolucioni i ngjarjes nxitën reagime të menjëhershme në sektorin e kriptomonedhave. Ish-drejtuesi kryesor dhe aksionari mazhoritar i Binance, Changpeng Zhao, u shpreh se se situata "duket si një sulm ndaj Binance". Në të njëjtën kohë, Paolo Ardoino, shefi i Tether – kompanisë që emeton monedhën e lidhur me dollarin USDT – deklaroi se ka ngrirë rreth 1.6 miliardë dollarë (1.4 miliardë euro) "lidhur me një sulm të mundshëm ndaj bursës Binance". Po ashtu, Jeremy Allaire, drejtues i platformës Circle, konfirmoi se kompania e tij ka bllokuar më shumë se 800 milionë dollarë (696 milionë euro) në USDC. Departamentet amerikane të Drejtësisë dhe FBI nuk iu përgjigjën menjëherë kërkesave për koment. Sulmi shkaktoi tronditje të menjëhershme në tregje, ku çmimet e shumicës së kriptomonedhave kryesore pësuan rënie të ndjeshme përpara se të shfaqnin shenja rikuperimi. Rreth orës 04:00 GMT (06:00 CEST), Bitcoin dhe Ethereum shënonin një rënie prej vetëm 0.8%, pasi kishin rënë më parë përkatësisht me gati 5% dhe 6%. Nga ana tjetër, BNB, kriptomonedha amtare e platformës Binance, u rikuperua me një rritje prej 2.7% pasi kishte pësuar fillimisht një rënie prej pothuajse 10%.