Fronti i ri kundër Ankarasë: Egjipti, Emiratet dhe Bahreini mbështesin Greqinë përballë marrëveshjes me Libinë

Një aleancë e papritur është formuar në skenën ndërkombëtare, ku Egjipti, Emiratet e Bashkuara Arabe dhe Bahreini kanë zgjedhur të rreshtohen krah Greqisë, duke kundërshtuar ashpër paktin detar të nënshkruar mes Turqisë dhe Libisë. Këto shtete e kanë cilësuar marrëveshjen në fjalë si një rrezik të drejtpërdrejtë për stabilitetin dhe sigurinë në rajon, si dhe një shkelje të normave ligjore ndërkombëtare. Qëndrimi zyrtar i këtyre katër vendeve u bë publik nga ministri i Jashtëm grek, Giorgos Gerapetritis, gjatë një seance në selinë e Kombeve të Bashkuara në New York. Në deklaratën e përbashkët, theksohet se ky pakt krijon një precedent të dëmshëm, pasi marrëveshjet dypalëshe të karakterit arbitrar mund të minojnë rendin e vendosur juridik detar. Duke adresuar çështjen, kryediplomati grek Gerapetritis shprehu gatishmërinë e Athinës për të nisur bisedime me palën libiane, me synim arritjen e një marrëveshjeje të re për delimitimin e zonave detare. Ai u bëri thirrje autoriteteve të Libisë që, gjatë kësaj faze tranzicioni politik, të përqendrohen në ruajtjen e marrëdhënieve të mira me fqinjët dhe në respektimin rigoroz të së drejtës ndërkombëtare të detit. tensionet në Mesdheun Lindor janë përshkallëzuar ndjeshëm që nga viti 2019, kohë kur Turqia dhe Libia zyrtarizuan për herë të parë vijat e tyre detare. Si kundërpërgjigje, Greqia ka ndërmarrë hapa për të forcuar ndikimin e saj, duke i dhënë dritën jeshile një konsorciumi të udhëhequr nga gjiganti amerikan Chevron për kërkime të gazit natyror në ujërat pranë Kretës. Situata u bë edhe më komplekse ditët e fundit, kur qeveria e Libisë lindore – e cila më parë ishte në një kamp të kundërt me atë të Turqisë – ratifikoi marrëveshjen e vitit 2019. Ky veprim, i konsideruar si një “bombë” gjeopolitike, ka shkaktuar tronditje të forta diplomatike, duke detyruar Greqinë dhe partnerët e saj arabë të ripozicionohen shpejt për të mbrojtur interesat e tyre në një zonë strategjike që ndodhet në qendër të përplasjeve të mëdha gjeostrategjike.