Spektakël nga Ronaldo: Het-trik brenda 15 minutash dhe synimi i madh drejt 1000 golave

Cristiano Ronaldo ka dhuruar një tjetër performancë magjike në futbollin saudit, duke udhëhequr Al Nassr drejt fitores 5:3 përballë Al Kholood, në kuadër të javës së 12-të të kampionatit. Ylli portugez ishte protagonist absolut në pjesën e dytë, duke realizuar tre gola brenda një harku kohor prej vetëm 15 minutash, shifër kjo që e çon numrin e përgjithshëm të golave të tij në karrierën zyrtare në 985. Ndeshja ishte mjaft dinamike që nga fillimi. Al Kholood kaloi në epërsi përmes Julien Domingues në minutën e 16-të, por Al Nassr u kundërpërgjigj shpejt me Ângelo Gabrielin (24') dhe Sadio Manen (38'). Megjithatë, mysafirët nuk u dorëzuan dhe barazuan shifrat në 2:2 në shtesën e pjesës së parë me Loïc Essomba. Për Ronaldon, pjesa e parë ishte frustruese, pasi iu anuluan dy gola për pozicion jashtë loje, njëri prej tyre pas rishikimit në VAR. Në fraksionin e dytë, portugezi mori frenat e lojës në dorë. Goli i parë erdhi në minutën e 66-të, pas një asisti perfekt nga Joao Felix. Gjashtë minuta më vonë, Ronaldo dyfishoi avantazhin me një goditje të saktë me kokë, sërish pas harkimit të Felixit. Het-trikun e kompletoi në minutën e 81-të, duke shfrytëzuar një asistim nga Sadio Mane për rezultatin 5:2. Në fund, Al Kholood ngushtoi diferencën në 5:3 me një penallti të Domingues në minutat shtesë. Joao Felix ishte gjithashtu figura kyçe e takimit, duke regjistruar plot katër asistime. Me këtë paraqitje, 41-vjeçari i afrohet gjithnjë e më shumë objektivit të tij historik: kuotës së 1000 golave zyrtarë për klubet dhe kombëtaren portugeze. Tashmë, atij i duhen edhe vetëm 15 gola për të shkruar historinë. Ky sukses i rëndësishëm e mban Al Nassr fuqishëm në garën për titull, me 28 pikë në tabelë, po aq sa kryesuesja Al Qadisiyah, por me një ndeshje më pak të zhvilluar. Ronaldo vazhdon të dëshmojë se mosha është thjesht një numër, duke ruajtur formën e lartë që nga transferimi i tij në Arabinë Saudite në fillim të vitit 2023.