Prapaskenat e sulmit të përgjakshëm në Vushtrri: Vetëdorëzohet i dyshuari, zbulohet vendi ku u fsheh arma

Një muaj pas incidentit të rëndë në Vushtrri, ku një 27-vjeçar mbeti me lëndime të rënda trupore, një nga personat e shpallur në kërkim policor ka vendosur t'i dorëzohet drejtësisë. I dyshuari, 28 vjeç, është paraqitur më 28 tetor në zyrat e hetuesve rajonalë në Mitrovicën e Jugut, duke bashkëpunuar me autoritetet për zbardhjen e rrethanave të ngjarjes. Gjatë seancës së intervistimit, i riu ka zbuluar vendndodhjen e një pistolete, e cila dyshohet se është përdorur gjatë sulmit të 30 shtatorit. Ngjarja kishte ndodhur në orët e para të mëngjesit, rreth orës 00:45, në afërsi të zonës së njohur si “Ura e Hekurit”. Në vendin e ngjarjes, policia kishte gjetur viktimën të mbuluar në gjak, i cili kishte raportuar se ishte goditur me mjete të forta nga disa persona, ndërkohë që njëri prej tyre kishte qëlluar disa herë me armë zjarri në ajër. Pasojat e këtij sulmi ishin të rënda për 27-vjeçarin, i cili pësoi fraktura në kokë, thyerje të hundës dhe dëmtime serioze në gishtërinjtë e të dyja duarve, duke kërkuar trajtim të specializuar në QKUK. Në vendin e ngjarjes, hetuesit gjetën gjithashtu një automjet të tipit VW Caddy, i cili ishte përplasur me një shtyllë ndriçimi, si dhe prova materiale të rëndësishme, përfshirë katër gëzhoja dhe municion luftarak. Kujtojmë se për këtë rast, më 7 tetor, në polici ishte paraqitur edhe një 57-vjeçar, të cilit Gjykata Themelore në Mitrovicë i kishte caktuar masën e paraburgimit për veprën penale “Vrasje në tentativë në bashkëkryerje”. Në bazë të informacioneve të siguruara nga i dyshuari i fundit, policia ka sekuestruar një pistoletë të modelit “Crvena Zastava” (model 70, kalibri 7.65 mm) së bashku me një fishek. Arma është dërguar për ekzaminime balistike për të konfirmuar lidhjen e saj me incidentin. Pas konsultimit me avokatin mbrojtës, ndaj 28-vjeçarit është vendosur masa e ndalimit policor prej 48 orësh, ndërkohë që hetimet për veprën “Vrasje në tentativë në bashkëkryerje” vijojnë intensivisht. Sipas legjislacionit në fuqi, personat e dyshuar gëzojnë prezumimin e pafajësisë derisa fajësia e tyre të vërtetohet përfundimisht nga një vendim gjyqësor i formës së prerë.