Kriza e Juventusit, Weston McKennie zbulon arsyen e vërtetë të dështimeve këtë sezon

Përfaqësuesit e Serie A, Juventus, kanë regjistruar tri humbje gjatë nëntë javëve të para të këtij edicioni garues, duke ngritur shqetësime serioze në kampin bardhezi. Përballja e fundit prodhoi një rezultat zhgënjyes prej 2-0 kundër Genoas, ndërkohë që skuadra dështoi totalisht në aspektin e lojës, duke shfaqur një paraqitje shumë të zbehtë në fushën e blertë. Mesfushori Weston McKennie ka theksuar se disfata e djeshme ndaj Genoas nuk lidhet aspak me vendimet taktike të shtabit teknik, pavarësisht se trajneri është detyruar të eksperimentojë vazhdimisht me skemat për shkak të mungesave të shumta nga dëmtimet. "Në fushë janë 11 lojtarë. Taktikat ndihmojnë, por të vraposh pesë apo dhjetë metra më shumë është ajo që bën diferencën; nuk janë taktikat. Bëhet fjalë për të qenë të vendosur për ta finalizuar një aksion, për t’u kthyer në mbrojtje dhe për të luftuar për shokun e skuadrës. Duhet të bëjmë më shumë", u shpreh ai. Në fund të deklaratës së tij, futbollisti amerikan bëri thirrje për reflektim të thellë brenda grupit, duke kërkuar reagim të menjëhershëm nga secili individ. "Thjesht, të bëjmë më shumë. Ne jemi Juventusi dhe te Juventusi nuk mund të kemi këto luhatje. Juventusi është një klub me histori të madhe dhe shumë fitore; duhet t’i kthehemi fitoreve me më shumë vazhdimësi. Fjalët nuk kanë më vlerë, por duhet vepruar duke nisur nga secili prej nesh", u shpreh McKennie.