Debutim i vështirë për Kombëtaren amatore, sllovakët dominojnë sfidën e parë në UEFA Regions’ Cup

Kombëtarja shqiptare e futbollit amator ka inauguruar sot zyrtarisht kampanjën e saj në kompeticionin evropian UEFA Regions’ Cup, duke u ballafaquar me përfaqësuesen e Sllovakisë në ndeshjen hapëse të grupit, e cila u zhvillua në ambientet e Shtëpisë së Futbollit. Përballja është mbyllur me rezultatin 6-1 në favor të skuadrës sllovake. Pjesa e parë e takimit foli plotësisht për miqtë, të cilët arritën të tundin rrjetën katër herë. Serinë e golave e hapi Palacka në minutën e 25-të, pasuar nga Gáborík në të 28-ën dhe Urban në të 37-ën. Avantazhi i sllovakëve u thellua edhe më tej në minutën e 43-të, kur Vass u tregua i saktë nga pika e bardhë e penalltisë. Me nisjen e fraksionit të dytë të lojës, kuqezinjtë reaguan duke gjetur golin e vetëm të takimit në minutën e 62-të nëpërmjet Shehut. Megjithatë, Sllovakia konfirmoi epërsinë e saj duke realizuar dy herë të tjera me anë të Urban në minutën e 74-t dhe Michalec në të 76-ën, duke vulosur shifrat përfundimtare 6-1. Në sfidën tjetër të vlefshme për Grupin 6, e cila u luajt paralel, formacioni italian i Piemonte Valle d’Aosta ka regjistruar një fitore të pastër 2-0 ndaj përfaqësueses së Irlandës së Veriut, NI Eastern. Përfaqësuesja shqiptare do të kërkojë kthesën në ndeshjen e dytë të grupit, e cila është programuar të zhvillohet ditën e diel, më 1 nëntor, në stadiumin “Egnatia Arena”, ku do të matë forcat me skuadrën e Italisë.