Tragjedi në Turqi: Masivi shkëmbor shkëputet nga shirat e rrëmbyeshëm, humbin jetën dy persona

Një ngjarje e rëndë ka tronditur rajonin turk të Kapadokisë, ku dy persona kanë ndërruar jetë dhe një tjetër ka pësuar lëndime si pasojë e shkëputjes dhe rënies së një masivi shkëmbor. Sipas njoftimeve zyrtare nga autoritetet vendase, ky aksident fatal erdhi si pasojë e reshjeve intensive të shiut që kishin përfshirë zonën gjatë asaj kohe. Guvernatori i provincës së Nevşehir-it, Hüseyin Aksoy, ka bërë të ditur se incidenti ka ndodhur rreth orës 15:15 me orën lokale, duke konfirmuar se moti i keq dhe reshjet e dendura janë shkaktarët kryesorë të kësaj fatkeqësie. Sipas detajeve, pjesë të një formacioni shkëmbor të njohur ndryshe si "oxhaqet e zanave" janë shkëputur dhe kanë rënë mbi disa kalimtarë pranë një muzeu në natyrë, në qytezën turistike Göreme. Pas sinjalizimit, ekipet e emergjencës dhe të shpëtimit u nisën me shpejtësi drejt vendit të ngjarjes, ku fatkeqësisht konfirmuan vdekjen e dy personave dhe nxorën të plagosurin. Guvernatori Aksoy shtoi se operacionet e kërkim-shpëtimit në terren vijojnë ende, ndërkohë që kombësia e viktimave mbetet ende e paqartë. Kapadokia është një ndër pikat turistike më të vizituara dhe më të njohura në shkallë globale, e famshme në veçanti për strukturat e saj unike të shkëmbinjve vullkanikë.