Tragjedia në Vitomiricë: Pezullohen nga detyra 11 zyrtarë të Policisë së Kosovës

Drejtoria e Policisë së Kosovës, mbështetur në Ligjin për Policinë, udhëzimet administrative përkatëse për masat disiplinore, si dhe pas sugjerimit zyrtar nga Inspektorati Policor i Kosovës (IPK), ka marrë vendim për suspendimin e 11 punonjësve policorë. Kjo masë vjen si pasojë e mënyrës se a u trajtua rasti i viktimës A. Z. në fshatin Vitomiricë të Pejës. Aktualisht, autoritetet e Inspektoratit Policor janë duke kryer hetime paraprake për të zbardhur në detaje çdo veprim apo mosveprim të mundshëm të zyrtarëve të përfshirë në këtë ngjarje të rëndë. Në komunikatën zyrtare bëhet e ditur se, në bazë të kërkesës së IPK-së, udhëheqja e PK-së ka pezulluar nga detyra funksionarët e lartë dhe hetuesit si vijon: ushtruesin detyrës së drejtorit rajonal në Drejtorinë Rajonale të Policisë në Pejë, udhëheqësin e hetimeve rajonale në po këtë drejtori, komandantin dhe zëvendëskomandantin e Stacionit Policor në Pejë, kryetarin e sektorit të hetimeve pranë këtij stacioni, ushtruesin e detyrës së shefit të sektorit operativ në Stacionin Policor të Pejës, komandantin e nënstacionit në Vitomiricë, si dhe katër hetues policorë që shërbejnë në Stacionin Policor të Pejës.