Përplasje në Kuvend: Filipçe i kërkon llogari Mickoskit për premtimet e pambajtura rreth emrit dhe Marrëveshjes së Prespës

Kryetari i LSDM-së, Venko Filipçe, gjatë seancës parlamentare për pyetje të deputetëve, ka ballafaquar kryeministrin Hristijan Mickoski me zotimet e tij të dikurshme lidhur me rikthimin e emrit të vjetër, zhbërjen e Marrëveshjes së Prespës, si dhe ndryshimin e fqinjësisë me Bullgarinë dhe kornizës negociuese. Duke e ftuar shefin e ekzekutivit të kalojë nga fjalët te veprat, kreu i opozitës i kërkoi atij që të dëshmojë konkretisht realizimin e premtimeve elektorale, në vend që të vazhdojë me deklarata pa mbulesë. "Ja ku jeni, kryeministër, keni një shans, njerëzit po presin që ju të riktheni emrin. Riktheni emrin. Ata po presin që ju të anuloni Marrëveshjen e Prespës. Anulojeni. Ata po presin që ju të ndryshoni ose përmirësoni marrëveshjen me Bullgarinë. Hajde, përmirësojeni. Ata po presin që ju të përmirësoni kornizën negociuese. Hajde, përmirësoni kornizën negociuese, premtuat 100 herë. Hajde, mbrojeni disi gjuhën më mirë, edhe pse kemi një marrëveshje të nënshkruar në gjuhën maqedonase me Bashkimin Evropian", u shpreh Filipçe. Sipas tij, pavarësisht përpjekjeve të Mickoskit për të manipuluar me çështjet e identitetit dhe gjuhës për përfitime ditore politike, kreu i shtetit Gordana Siljanovska-Davkova dhe ajo e Komisionit Evropian, Ursula von der Leyen, tashmë kanë konfirmuar zyrtarisht se këto elemente janë plotësisht të mbrojtura. Në këtë linjë, ai theksoi se e ardhmja eurointegruese e vendit mbetet e sigurt, duke garantuar se rruga drejt Bashkimit Evropian është e hapur ndërkohë që gjuha dhe identiteti maqedonas mbeten të paprekura. “Ndoshta do të vazhdoni të mbroni identitetin dhe gjuhën tuaj kur të hapni pishinat, megjithëse Gordana Sijanovska ju tha se si identiteti ashtu edhe gjuha janë të mbrojtura, dhe Presidentja von der Leyen tha të njëjtën gjë, ne po ju presim në Evropë me identitetin dhe gjuhën tuaj”, përfundoi Filipçe.