Tronditje në Kuvend pas vrasjes së Arlinda Zekajt: Opozita kërkon largimin e Gërvallës dhe Sveçlës, mungojnë krerët e shtetit

Tragjedia e rëndë në Vitomiricë të Pejës, ku 49-vjeçarja Arlinda Zekaj u vra pavarësisht se kishte urdhër mbrojtjeje dhe se aktakuza ndaj bashkëshortit të saj mbërriti vetëm pas krimit, është shndërruar në krizën kryesore politike të çastit. Konfirmimi i Këshillit Gjyqësor të Kosovës për këtë vonesë ka ngritur tensionet në skenën politike, ndërsa partitë opozitare kanë ngritur zërin duke kërkuar dorëheqjen e menjëhershme të ministres së Drejtësisë, Donika Gërvalla, dhe të ministrit të Punëve të Brendshme, Xhelal Sveçla. Në seancën e sotme plenare të Kuvendit të Kosovës, vëmendja është dominuar nga mungesa e të dy ministrave të përmendur, si dhe e kryeministrit Albin Kurti. Opozita i ka vënë gishtin e fajit ekzekutivit për dështimin e mekanizmave të sigurisë dhe drejtësisë në mbrojtjen e jetës së viktimës, duke kërkuar nga kreu i qeverisë shkarkimin e të gjithë zyrtarëve përgjegjës për këtë ngjarje të rëndë. Kryetari i Lidhjes Demokratike të Kosovës, Lumir Abdixhiku, në fjalën e tij me të hyrë në sallën e Kuvendit, theksoi se humbja e jetës së Arlindës dëshmon një dështim sistemik të institucioneve tona. Ai kërkoi që llogaridhënie të kërkohet në çdo hallkë të zinxhirit komandues dhe në nivelin më të lartë politik, duke shtuar se reagimet simbolike pas çdo tragjedie nuk mjaftojnë dhe se duhet të ketë përgjegjësi kolektive për dhunën me bazë gjinore. Edhe deputetë të tjerë kanë shprehur indinjatë të thellë. Deputetja e Partisë Demokratike të Kosovës, Blerta Deliu-Kodra, u shpreh e tronditur nga mënyra se a u reagua nga strukturat policore në rastin e Pejës, ndërsa homologja e saj nga LDK-ja, Jehona Lushaku Sadriu, kërkoi veprim urgjent nga kryeministri. Edhe Aleanca për Ardhmërinë e Kosovës i është bashkuar thirrjeve për largimin e Gërvallës dhe Sveçlës. Sipas kësaj partie, përgjegjësia për dështimin e strategjisë shtetërore kundër dhunës bie mbi dikasterin e Drejtësisë, kurse ministri i Brendshëm duhet të dorëhiqet për shkak të asaj që e cilësuan si menaxhim skandaloz të rastit. Kujtojmë se Arlinda Zekaj u privua nga jeta të dielën në fshatin Vitomiricë të Pejës. Të hënën, Policia e Kosovës prangosi kunatin e saj, i cili tashmë mbahet si i dyshuar kryesor për vrasjen. Reagimi qytetar është ndezur fuqishëm nga fakti se viktima ishte pajisur me urdhër mbrojtjeje, por institucionet dështuan ta shpëtonin, ndërsa vonesa e aktakuzës ndaj bashkëshortit ka shtuar dilemat e mëdha rreth efikasitetit të policisë, prokurorisë dhe gjykatave. Vlen të theksohet se Kuvendi i Kosovës kishte organizuar më 26 tetor një seancë të jashtëzakonshme pikërisht për trajtimin e vrasjeve të grave, dukuritë e dhunës në familje dhe domosdoshmërinë e llogaridhënies institucionale. Në shenjë revolte, një ditë më parë në Prishtinë u mbajt një protestë e thirrur nga Kolektivi për Mendim dhe Veprim Feminist, ku morën pjesë edhe anëtarë të familjes së viktimës. Të pranishmit marshuan nga sheshi “Zahir Pajaziti” duke u ndalur para dyerve të Ministrisë së Drejtësisë, Këshillit Prokurorial, Këshillit Gjyqësor, Policisë dhe Qeverisë, ku përsëritën thirrjet për dorëheqjen e Gërvallës dhe Sveçlës, ndërsa organizatorët paralajmëruan vazhdimin dhe përshkallëzimin e protestave. Po ashtu, sot në orën 12:00, është paralajmëruar një tjetër protestë gjithëqytetare për drejtësi ndaj rastit të Arlinda Zekajt në qytetin e Ferizajit, e cila do të nisë para ndërtesës së Komunës dhe do të ketë ndalesa para institucioneve relevante publike.