Vrasja në Vitomiricë: Avokatja tregon si nëna e bindi Albert Sylajn të dorëzohej para se të kryente vetëvrasje

Gjykata Themelore në Pejë ka vendosur masën e paraburgimit prej një muaji, deri më 27 nëntor 2026, për Albert Sylajn, i cili dyshohet për privimin nga jeta në mënyrë mizore të ish-kunatës së tij, Arlinda Zekaj, ngjarje kjo e regjistruar në fshatin Vitomiricë të Pejës. Në seancën dëgjimore të mbajtur më 28 tetor 2026, prokurorja Sahide Gashi theksoi se Policia Rajonale kishte dorëzuar kallëzimin penal më 27 tetor, mbështetur në raportet e hetuesve dhe provat e mbledhura. Sipas akuzës, dyshohet se Sylaj kreu këtë krim makabër nga hakmarrja, për shkak të ndalimit policor të vëllait të tij, Jeton Sylajt. Prokuroria kërkoi me insistim paraburgimin, duke argumentuar rrezikun real se i pandhëuri mund të arratiset sërish, sidomos duke marrë parasysh se pas krimit ai ishte larguar dhe përballet me një vepër penale që parashikon dënim deri në burgim të përjetshëm. Për më tepër, organet e ndjekjes ende nuk kanë arritur të marrin në pyetje dëshmitarët kyç, përfshirë fëmijët e të dyshuarit dhe të viktimës që janë të mitur, bashkëshorten, vëllain e tij Dritonin, si dhe dëshmitarë të tjerë e pjesëtarë të Policisë. Gjatë hetimeve është konfirmuar gjithashtu se Sylaj posedonte një armë pa leje, e cila ende nuk është gjetur, ndërsa nga e kaluara kriminale rezulton i dënuar me katër aktgjykime të formës së prerë. Nga ana e saj, avokatja e caktuar sipas detyrës zyrtare, Katarina Voksani, ka zbuluar detaje dramatike nga momenti i dorëzimit të klientit të saj. Ajo tregoi se Sylaj ishte në prag të vetëvrasjes pas kryerjes së veprës dhe kishte telefonuar nënën e tij për t'i kërkuar “hallallin e fundit”. Falë ndërhyrjes emocionale të nënës, e cila i tha se më mirë do të vdiste vetë sesa ta shihte djalin e saj duke kryer një akt të tillë, ai u bind që të dorëzohej tek organet e rendit. Mbrojtja deklaroi se i pandehuri me vetëdëshirë ka dalë me duar të ngritura për t'u dorëzuar në shtëpinë e tij në Deçan, ndërsa ngriti pretendime për sjellje të ashpra të forcave policore gjatë ndërhyrjes ndaj vëllait tjetër të të dyshuarit. Duke u bazuar në këto rrethana, avokatja Voksani i kërkoi gjykatës caktimin e masës së dorëzanisë, duke këmbëngulur se nuk ekziston rreziku i ikjes së të mbrojturit të saj.