Gara për Policinë e Shtetit: Rreth 1000 kandidatë vazhdojnë fazat e testimit, Hita premton transparencë dhe meritokraci

Një grup prej rreth 1000 kandidatësh po vijojnë garën zyrtare për t’u bërë pjesë e Patrullës së Përgjithshme në radhët e Policisë së Shtetit, duke kaluar përmes fazave të rëndësishme të testimit mjekësor, fizik dhe psikologjik. Gjatë këtij procesi selektimi, Drejtori i Përgjithshëm i Policisë së Shtetit, Skënder Hita, ka zhvilluar një vizitë inspektimi në ambientet e Akademisë së Sigurisë, ku ka zhvilluar një bashkëbisedim të hapur me aspirantët. Kreu i institucionit të rendit shprehu vlerësimin e tij për interesimin masiv të të rinjve, duke i falënderuar ata për besimin e dëshmuar ndaj strukturave policore. Sipas tij, ky numër i lartë aplikimesh shërben si një dëshmi pozitive dhe një shtysë e fuqishme për të vazhduar përpjekjet drejt rritjes së kapaciteteve njerëzore dhe konsolidimit të një force policore sa më profesioniste. “Ju falënderoj për interesin dhe besimin që keni treguar për Policinë e Shtetit, duke zgjedhur të konkurroni për t’u bërë pjesë e saj. Numri i lartë i aplikantëve, rreth 1300 në fazën fillestare dhe tashmë rreth 1000 pas fazës së parë, është një tregues pozitiv dhe motivim për të vijuar forcimin e kapaciteteve njerëzore dhe ndërtimin e një policie gjithnjë e më profesionale”, deklaroi Hita. Duke iu drejtuar pjesëmarrësve, zyrtar i lartë i policisë u uroi fat dhe suksese në sfidat e ardhshme të konkurrimit, duke i ftuar që të japin maksimumin e tyre për të përmbushur me sukses të gjitha kriteret e përcaktuara brenda kuotave zyrtare. Në fjalën e tij, Hita garantoi se i gjithë cikli i përzgjedhjes do të udhëhiqet nga parimet e transparencës së plotë dhe barazisë së shanseve për çdo garues pa përjashtim. “Ju uroj suksese në fazat e konkurrimit dhe ju inkurajoj të angazhoheni maksimalisht për t’u kualifikuar brenda kuotave të përcaktuara. Ju siguroj se procesi deri në fund do të jetë tërësisht transparent dhe do të garantojë shanse të barabarta për të gjithë. Jepni maksimumin tuaj dhe shikojeni këtë mundësi si një privilegj për të dëshmuar aftësitë dhe vullnetin tuaj për t’u bërë pjesë e familjes sonë të madhe, Policisë së Shtetit, dhe për t’iu shërbyer qytetarëve me profesionalizëm e përgjegjshmëri”, u shpreh Skënder Hita.