Tragjedia e Liridona Ademajt: Familja kërkon drejtësi dhe burgim të përjetshëm për të gjithë të dyshuarit në Apel

Pas përfundimit të seancës dëgjimore në Gjykatën e Apelit lidhur me vrasjen e bujshme të Liridona Ademajt, ka reaguar ashpër vëllai i saj, Leonard Ademaj, duke shprehur qëndrimin e prerë të familjes rreth kësaj çështjeje. Gjatë fjalës së tij për media, ai e cilësoi si të papranueshme mbylljen e dyerve të kësaj seance për publikun, duke potencuar se drejtësia duhej të ishte më transparente për të dëshmuar mbrojtjen e grave dhe nënave në shoqëri. Pavarësisht pakënaqësive me procedurat e ndjekura gjatë ditës, familja Ademaj mbetet me sytë nga drejtësia, duke kërkuar dënimin maksimal me burgim të përjetshëm për Naim Murselin, Granit Plavën, si dhe duke shpresuar që e njëjta masë ndëshkimore t'i shqiptohet edhe Kushtrim Kokallës. "Çfarë pamë ne sot në këtë seancë, nuk ishte e hijshme. Sot gjykata mundi ta thotë të vërtetën dhe t’i lirojë mediat, e të krijojë bindjen se i mbron gratë, motrat e nënat tona. Ne presim që vendimi të jetë ai si për Naimin, Granitin me burgim të përjetshëm dhe shpresojmë që këtij vendimi t’i bashkëngjitet edhe Kushtrim Kokalla", u shpreh ndër të tjera ai. Kujtojmë se kjo seancë u zhvillua pasi Naim Murseli i është drejtuar Gjykatës së Apelit me një ankesë zyrtare, përmes së cilës po kërkon një dënim më të lehtë gjyqësor.