Vrasja e biznesmenit Bedri Rexhepi: Jeton Vllasaliu sfidon dënimin me burgim të përjetshëm në Gjykatën Supreme

Gjykata Supreme ka zhvilluar këtë të enjte seancën gjyqësore për shqyrtimin e kërkesës për mbrojtjen e ligjshmërisë, lidhur me rastin e bujshëm të vrasjes së biznesmenit Bedri Rexhepi, ku të akuzuar kryesorë janë Jeton dhe Nexhat Vllasaliu. Të dy të pandehurit akuzohen se në vitin 2021 privuan nga jeta biznesmenin Rexhepi me motive përfitimi material, ngjarje kjo që kishte tronditur opinionin publik. Gjatë seancës para trupit gjykues, i akuzuari Jeton Vllasaliu ka bërë të qartë se nuk pajtohet aspak me vendimin e deritanishëm që e dënoi atë me burgim të përjetshëm. “E mbështes fjalën e avokatit dhe e kundërshtoj aktgjykimin e shkallës së parë”, u shpreh shkurtimisht i pandehuri Vllasaliu gjatë fjalës së tij në gjykatë. Kujtojmë se Gjykata Themelore në Prishtinë, më 28 maj 2025, kishte shpallur dënimin me burgim të përjetshëm për Jeton dhe Nexhat Vllasaliun për këtë vrasje të rëndë, vendim i cili më pas kishte marrë edhe vulën e Gjykatës së Apelit, e cila e kishte konfirmuar atë në të in tërësi. Sipas dosjes së Prokurorisë Themelore në Prishtinë, dy të pandehurit ngarkohen zyrtarisht me veprën penale “Vrasje e rëndë”, e parashikuar sipas nenit 173, paragrafi 1.6 dhe 1.4, lidhur me nenin 31 të Kodit Penal të Republikës së Kosovës (KPRK). Hetimet dhe aktakuza dëshmojnë se gjatë periudhës nga 9 janari deri më 8 prill të vitit 2021, Jeton dhe Nexhat Vllasaliu kishin vepruar në bashkëkryerje dhe pas një organizimi të detajuar paraprak, kishin kurthuar biznesmenin Rexhepi me qëllimin e vetëm zhvatjen dhe fitimin e pasurisë së paligjshme. Përveç akuzës për vrasje, dyshimet e Prokurorisë ndaj tyre përfshijnë edhe veprën penale “Dëmtim i varreve apo kufomave”, e cila sanksionohet nga neni 413, paragrafi 2, në lidhje me nenin 31 të KPRK-së.