Udhëtimi aventurier merr fund tragjikisht në Nikaragua: Humbin jetën tre të reja, mes tyre edhe blogerja e njohur franceze

Një ekspeditë eksplorimi në territorin e Nikaraguas është shndërruar në një ngjarje fatkeqe për tri vajza të reja, në mesin e të cilave ishte edhe krijuesja e njohur e përmbajtjeve digjitale nga Franca, Emma Marie Laurent, 24 vjeçe. Ato ndërruan jetë pasi mjeti fuoristradë me të cilin po lëviznin u përfshi dhe u mor para nga rrjedhja e furishme e një lumi të fryrë në rajonin verior të shtetit latino-amerikan. Ngjarja tragjike ndodhi gjatë orëve të para të mëngjesit të 9 tetorit, teksa grupi po vizitonte zonat veriore të vendit. Sipas autoriteteve vendase, viktimat u identifikuan si 24-vjeçarja franceze Emma Marie Laurent, shtetasja zvicerane Noelle Lusser, 20 vjeçe, dhe 19-vjeçarja Karen Lopez Montano, e cila ishte e punësuar në një strukturë hoteliere lokale. Ato po udhëtonin me një automjet bujqësor të modelit Toyota Hilux, që drejtohej nga Martin Gerardo Garcia Giron. Ai mbeti i vetmi i mbijetuar i këtij aksidenti, pasi provoi të kapërcejë lumin Nahualapa, pavarësisht nivelit të lartë dhe prurjeve të rrezikshme të ujit. Forca e madhe e ujit bëri që kamioni të tërhiqej nga rryma, duke sjellë humbjen e jetës së tri pasagjereve. Ky incident ka tronditur opinionin publik, ndërsa bashkëpresidentja e Nikaraguas, Rosario Murillo, ka bërë një apel publik për rrezikshmërinë e kalimit të lumenjve gjatë stinëve me reshje dhe prurje të shtuara. “Kaluan një lumë në një kohë kur nuk duhej. Lumenjtë janë mashtrues. Mendon se gjithçka është e qetë dhe më pas, papritur, vjen rryma dhe ndodhin tragjedi të tilla”, deklaroi ndër të tjera Murillo. E ndjera Emma Marie Laurent ishte një emër i njohur për adhuruesit e udhëtimeve në rrjetet sociale, ku numëronte rreth 43 mijë ndjekës. Ajo identifikohej si një shpirt i lirë që jetonte në lëvizje të vazhdueshme, duke dokumentuar çdo cep të botës përmes udhëtimeve të saj dhe jetës nomade në një furgon. Nëpërmjet materialeve vizuale dhe postimeve të saj, 24-vjeçarja kishte pasqyruar përjetimet e saj nga destinacione të ndryshme në Evropë, Afrikë dhe Karaibe. Megjithatë, vizita në Nikaragua, e cila premtonte të ishte një tjetër kujtim i bukur në karrierën e saj prej udhëtareje, u shndërrua në kapitullin e fundit për të dhe dy shoqet e saj të udhëtimit.