Nga regjimi i rreptë te mungesa e ujit: Veliaj denoncon kushtet në burgun e Fierit dhe pamundësinë e kontaktit me familjen

Kryetari i Bashkisë së Tiranës, Erion Veliaj, ka alarmuar mbi kushtet e vështira të izolimit në të cilat po mbahet në IEVP Fier, ku u zhvendos të mërkurën nga institucioni i paraburgimit në Durrës. Pas rreth 20 muajsh qëndrimi në paraburgim, shkaqet zyrtare të këtij transferimi mbeten ende të pasqaruara nga autoritetet. Përmes një letre të dërguar nga ambientet e burgut të Fierit, Veliaj ka shpalosur kufizimet e ashpra me të cilat po përballet. Ai njofton se është vendosur në një regjim izolimi 10-ditor, ku i mungon uji, dritarja në qeli, si dhe asistenca mjekësore. Ndër të tjera, ai nërmend se i është ndaluar e drejta e komunikimit me të afërmit dhe mbrojtësin e tij ligjor, ndërsa qelia e tij ndodhet në të njëjtin korridor me tre të dënuar me burgim të përjetshëm për vrasje. Ndaj kësaj situate ka reaguar edhe avokati i tij mbrojtës, Plarent Ndreca, i cili ka shprehur shqetësimin mbi rrethanat e akomodimit, duke theksuar se hapësira ku po mbahet Veliaj nuk përmbush as standardet më minimale për një person me statusin e të paraburgosurit. Ndreca nënvizoi se ambientit i mungon ndriçimi natyral, ajrimi i mjaftueshëm, si dhe dritaret. Mbrojtja ligjore bëri të ditur se është në pritje të një reagimi nga organet kompetente, ndërkohë që nëse nuk merret përgjigje ose nëse masa vlerësohet e pambështetur në ligj dhe e padrejtë, do t'i drejtohen rrugës gjyqësore. Sipas Ndrecës, brengosja kryesore e kryebashkiakut lidhet me pamundësinë për të kontaktuar me fëmijët dhe pjesëtarët e tjerë të familjes, pasi deri më tani i është pamundësuar çdo lloj lidhjeje me jashtë, përfshirë edhe me avokatin e tij. Lidhur me vazhdimësinë e detyrës në krye të kryeqytetit, avokati Ndreca u shpreh se Veliaj ka detyrim kushtetues të ushtrojë funksionet e tij deri në përfundim të plotë të mandatit. Ndërkohë, deri në këto momente, Drejtoria e Përgjithshme e Burgjeve nuk ka nxjerrë asnjë deklaratë zyrtare për të sqaruar shkaqet e këtij transferimi apo për t'iu përgjigjur pretendimeve mbi kushtet e izolimit.