Policia e Izraelit rrëzon akuzat e partisë së Netanyahut: Nuk ka asnjë dëshmi për manipulim të procesit zgjedhor

Autoritetet policore në Izrael kanë hedhur poshtë kategorikisht pretendimet e partisë Likud, e udhëhequr nga kryeministri Benjamin Netanyahu, sipas të cilave procesi zgjedhor është "vjedhur" nga subjektet politike arabe. Përmes një deklarate për mediat vendase, një burim nga policia bëri të ditur se dita e votimit u karakterizua nga një numër mjaft i ulët i parregullsive sa i përket integritetit të zgjedhjeve, madje edhe në krahasim me proceset e mëparshme. Ai nërmori të theksojë se nuk ekziston asnjë provë mbështetëse e bazuar në hetime apo të dhëna inteligjence për akuzat e ngritura. Gjithashtu, pretendimet për mashtrim zgjedhor janë cilësuar si të pabazuara edhe nga një zyrtar i Komisionit Qendror të Zgjedhjeve gjatë ditës së djeshme. Ndërsa procesi i numërimit të votave vazhdon ende, forcat politike arabe kanë arritur të sigurojnë 19 ulëse në zgjedhjet e zhvilluara të martën, falë një pjesëmarrjeje të paprecedentë nga komuniteti arab. Sipas raportimeve mediatike vendase përpara procesit të votimit, partia Likud kishte përgatitur paraprakisht një sërë ankesash dhe akuzash për mashtrim. Plani i kësaj partie parashikonte kontestimin e rezultateve në zonat e banuara nga komuniteti arab dhe aludimet për "vjedhje të zgjedhjeve" në rast se Netanyahu nuk do të siguronte fitoren.