Pas humbjes së Vuçiqit, eksperti ndërkombëtar kërkon nga Serbia njohjen e menjëhershme të Kosovës dhe anëtarësim të përshpejtuar në BE

Eksperti i njohur, Gunther Fehlinger, ka përshëndetur atë që e ka quajtur humbje historike në zgjedhje të Aleksandar Vuçiqit, duke e vlerësuar këtë si një kthesë vendimtare për demokracinë në Serbi dhe një mundësi të artë për Kosovën dhe mbarë Ballkanin Perëndimor. Gjatë një prononcimi, ai bëri të qartë se largimi i deritanishëm nga pushteti nuk mjafton, nëse nuk çrrënjoset përfundimisht trashëgimia politike e lidershipit të kaluar, e cila sipas tij është ushqyer nga nacionalizmi, tensionet, frikësimi dhe lidhjet e ngushta me Moskën. "E mirëpres humbjen historike në zgjedhje të Aleksandar Vuçiqit, tiranit të Serbisë dhe ngacmuesit të Ballkanit", u shpreh Fehlinger, duke shtuar se data 25 tetor 2026 shënon një triumf të rëndësishëm për qytetarët dhe studentët e guximshëm serbë, të cilët arritën të thyejnë hegjemoninë zgjedhore të aparatit politik të Vuçiqit. Megjithatë, ai theksoi se ky ndryshim udhëheqjeje në Beograd duhet të konkretizohet domosdoshmërisht me vendime të matura politike dhe jo thjesht me ndryshim të fjalorit publik. Sipas tij, shpërbërja e kësaj makinerie politike është vetëm hapi i parë drejt një të ardhmeje më të shëndetshme rajonale. Në këtë kuadër, Fehlinger ka hedhur në tryezë një propozim për një pakt të ri evropian mes Serbisë dhe Kosovës. Ai ka kërkuar që autoritetet e reja në Beograd ta njohin pa vonesë Republikën e Kosovës si një shtet të pavarur, sovran dhe plotësisht të barabartë në familjen evropiane. Ai nënvizoi se shtetësia e Kosovës është e pakthyeshme dhe dëshirohet që çdo lloj pretendimi territorial apo përpjekje për të dëmtuar sovranitetin e saj të marrë fund njëherë e përgjithmonë. "Qeveria e re serbe duhet ta njohë Republikën e Kosovës menjëherë si shtet të pavarur, sovran dhe të barabartë evropian. Pavarësia e Kosovës është e pakthyeshme. Nuk duhet të ketë më pretendime territoriale, frikësim nacionalist apo përpjekje për ta minuar sovranitetin e Kosovës", u shpreh ai. Duke theksuar se perspektiva e Serbisë nuk mund të mbetet peng e tensioneve të shkuara, eksperti ka fshikulluar nevojën që ky hap të shpërblehet nga Bashkimi Evropian me një proces të përshpejtuar integrimi. Ai u ka bërë thirrje Komisionit Evropian, Këshillit Evropian dhe vendeve anëtare që t'i sigurojnë Serbisë një rrugë më të shpejtë drejt anëtarësimit, në këmbim të njohjes së Kosovës dhe zbatimit të reformave thelbësore. Duke qenë se Serbia mban tashmë statusin e vendit kandidat, Fehlinger kërkon dinamikë të re në negociata, përfshirë hapjen e kapitujve të rinj, mbështetje më të madhe financiare dhe afrim ekonomik, duke e vënë Serbinë në një linjë të besueshme meritokratike, të ngjashme me Malin e Zi. Në të njëjtën kohë, ky zhvillim, sipas tij, duhet t'i hapë dyert edhe Kosovës drejt një hapi të madh evropian. Ai i ka bërë thirrje bllokut evropian që t'i akordojë menjëherë Kosovës statusin e vendit kandidat dhe të përshpejtojë procedurat për hapjen e bisedimeve zyrtare të anëtarësimit.