Gara për LDK-në, Arben Gashi konfirmon zyrtarisht ambiciet për t'u bërë kryetar

Deputeti dhe figura e njohur e Lidhjes Demokratike të Kosovës, Arben Gashi, ka bërë të ditur se synon të garojë për të marrë drejtimin e partisë. Gjatë një paraqitjeje televizive në emisionin "Pressing" në T7, ai ka shprehur hapur ambiciet e tij për kreun e këtij subjekti politik. Gjatë diskutimit rreth së ardhmes së partisë dhe udhëheqjes së re, Gashi u përgjigj pozitivisht për mundësinë e kandidimit, duke e kushtëzuar atë me zhvillimin e një procesi zgjedhor fer, transparent dhe me standarde të larta demokratike. "Nëse nuk ka konsensus për ndonjë kryetar, hapet gara dhe do jem.... Nëse do ketë konsensus paraprak në kompromis nuk duhet të jemi destruktiv, nëse hapet gara do të jem kandidat", deklaroi ai, duke lënë të hapur mundësinë e garës në mungesë të një marrëveshjeje unanime.