Vazhdon rënia e lirë e Partizanit, Elbasani triumfon me përmbysje spektakolare në shtëpi

Thellohet edhe më shumë kriza e rezultateve për skuadrën e Partizanit, e cila ka regjistruar humbjen e gjashtë radhazi në kampionat. Në sfidën e zhvilluar në “Elbasan Arena”, “të kuqtë” janë mposhtur me rezultatin 2-1 nga vendasit e Elbasanit, në një takim të luftuar fort dhe me kthesa dramatike rezultati. Fillimi i ndeshjes favorizoi miqtë, të cilët kaluan të parët në epërsi falë një paraqitjeje fantastike nga Jovicic, i cili shënoi në debutimin e tij me fanellën e Partizanit. Dominimi i kryeqytetasve u reflektua edhe në raste të tjera, ku i njëjti lojtar gjeti sërish rrjetën, por ky gol u anulua nga gjyqtarët për pozicion jashtë loje. Fraksioni i parë i lojës u mbyll me epërsinë minimale 1-0 në favor të Partizanit. Me nisjen e pjesës së dytë, Elbasani ndryshoi qasjen në fushë dhe rriti ndjeshëm ritmin, duke rrezikuar portën kundërshtare me anë të Nikajt dhe Boriçit. Përballja mbeti e hapur dhe mjaft dinamike, derisa në minutën e 82-të, verdheblutë gjetën golin e shumëpritur të barazimit përmes Mazarit. Momenti deciziv i takimit erdhi në çastet e fundit të ndeshjes, kur fillimisht Nikaj shënoi, por goli u sinjalizua fillimisht si jashtë loje. Megjithatë, pas rishikimit të situatës në sistemin VAR, kryesori Çelaj ndryshoi vendimin dhe e akordoi golin si të rregullt. Ky triumf me përmbysje i dhuron trajnerit Daja fitoren e tij të parë në krye të skuadrës së Elbasanit. Pas këtij rezultati, Elbasani ngjitet në kuotën e 11 pikëve, ndërsa Partizani vijon të mbetet në vendin e fundit të klasifikimit me vetëm 4 pikë në llogari, duke mbyllur në këtë mënyrë një fazë të parë tejet zhgënjyese.