“Shpifjet nuk kalojnë!” – Anita Haradinaj ikërkon falje publike deputetes së VV-së për akuzat ndaj Ramushit

Anita Haradinaj ka ndërmarrë një hap të ashpër publik ndaj ligjvënëses së Lëvizjes Vetëvendosje, Arjeta Fejza, pasi kjo e fundit përmendi ish-kryeministrin dhe deputetin e AAK-së, Ramush Haradinaj, gjatë një debati mbi dhunën ndaj grave. Përmes një postimi në rrjetet sociale, Anita ka kërkuar që deputetja të tërheqë menjëherë fjalët e saj, të distancohet publikisht dhe të kërkojë falje, duke i cilësuar pretendimet e ngritura si tejet serioze. “Shpifjet nuk kalojnë!”, ka nisur reagimin e saj ajo, duke shtuar se liria e fjalës dhe diskursi publik kërkojnë llogaridhënie të lartë morale dhe institucionale. Duke u prezantuar edhe si gazetare me përvojë afatgjatë në skenën publike, ajo theksoi se bën dallimin e qartë mes përplasjeve politike dhe deklaratave që cenojnë padrejtësisht integritetin e dikujt. “Si gazetare dhe si person që për shumë vite kam qenë pjesë e jetës publike, e di mirë dallimin ndërmjet debatit politik, mendimit të lirë dhe deklaratave që mund të cenojnë padrejtësisht dinjitetin dhe reputacionin e një personi”, ka shtuar ajo. Megjithëse nuk dëshiron që situata të degradojë në një konflikt personal, Haradinaj u tregua e prerë se nuk do të heshtë kur cenohet imazhi i familjes së saj. “Po ashtu, kur deklaratat përfshijnë apo prekin figurën dhe familjen, kam të drejtë të kërkoj që faktet të respektohen dhe që çdo pretendim të mbështetet në prova, e jo në insinuata apo akuza të pabazuara”, ka shkruar më tej ajo. Duke iu drejtuar drejtpërdrejt deputetes Fejza, ajo kërkoi reflektim të menjëhershëm dhe distancim nga ato që i quajti akuza të rreme. “Prandaj, të kërkoj publikisht, zonja ‘deputete’, që ta tërheqësh deklaratën, të distancohesh dhe të kërkosh falje publike për shpifjen dhe akuzat e pabaza, sepse ato rezultojnë të pavërteta dhe cenojnë të drejtat tona!”, u shpreh ajo. Në fund të mesazhit të saj, Anita lëshoi një paralajmërim se do të ndjekë rrugët ligjore nëse nuk ka një ndjesë zyrtare. “Në mungesë të një reagimi të përshtatshëm dhe të një kërkimfaljeje publike, si dhe të distancimit tuaj nga ajo që keni deklaruar publikisht në një televizion kombëtar, unë obligohem dhe do t’ua besoj organeve kompetente vlerësimin e kësaj çështjeje, pra do të ndjek rrugët ligjore që më takojnë”, përfundoi ajo. Reagimi i saj vjen pasi deputetja Arjeta Fejza, gjatë një paraqitjeje në emisionin “Konfront”, foli mbi dukurinë e dhunës në familje dhe citoi shkrime mediatike për pretendime të dhunës nga ana e Ramush Haradinaj ndaj bashkëshortes së tij.