Agjenda e 29 tetorit: Seancë plenare, zhvillime në Gjykatën e Apelit dhe ngjarje të rëndësishme institucionale e shoqërore

Kryeqyteti do të jetë qendra e një sërë aktivitetesh të rëndësishme institucionale, akademike dhe të shoqërisë civile, duke nisur që në orët e para të mëngjesit të datës 29 tetor. Në orën 09:00, në Rektoratin e Universitetit të Prishtinës do të mbahet ceremonia e nënshkrimit të memorandumit të mirëkuptimit mes këtij institucioni dhe Ambasadores së Vullnetit të Mirë për Kosovën në IHRC, Elvana Shala. Ndërkaq, në orën 09:30, në ambientet e “Europe House” në Prishtinë, platforma Hibrid.info në bashkëpunim me Bashkimin Evropian në Kosovë organizon tryezën e diskutimit të titulluar “Edukimi medial në arsim: Nga gjetjet te veprimi”. Kuvendi i Kosovës do t'i fillojë punimet e ditës duke mbajtur seancën plenare të radhës, e cila është caktuar të nisë në orën 10:00. Po në orën 10:00, në hotelin “Swiss Diamond” në Prishtinë, Qendra Kosovare për Rehabilitimin e të Mbijetuarve të Torturës organizon konferencën me fokus “Zbatimi i marrëveshjes Kosovë–Danimarkë për transferimin e të burgosurve në Kosovë: sfidat ligjore, të drejtat e njeriut dhe çështjet operacionale”. Në këtë ngjarje është paraparë pjesëmarrja e kryeministrit Albin Kurti dhe ministres së Drejtësisë, Donika Gërvalla. Në Pallatin e Drejtësisë në Hajvali, duke filluar nga ora 11:10, Gjykata e Apelit do të shqyrtojë ankesën e Naim Murselit, i cili është i dënuar me burgim të përjetshëm për vrasjen e bashkëshortes së tij, Liridona Ademaj. Aktivitetet vazhdojnë pas mesditës, ku në orën 13:00, në hotelin “Swiss Diamond”, Instituti Riinvest dhe Forumi Ekonomik i Grave (FEG) organizojnë tryezën e diskutimit: “Rishikimi i politikave familjare të përgjegjshme ndaj gjinisë në Kosovë: Implikimet financiare, praktikat rajonale dhe alternativat e politikave”. Kjo tryezë do të mbledhë personalitete si ministri për Punë, Familje dhe Vlerat e Luftës Çlirimtare, Andin Hoti, si dhe udhëheqësen e Zyrës së UNFPA-së në Kosovë, Visare Mujko-Nimani. Në orën 13:30, në hotelin “Emerald” në Prishtinë, Grupi i Bankës Botërore do të bëjë prezantimin e vlerësimit diagnostik të sektorit privat të vendit (CPSD) për Kosovën. Ndërkaq, gjatë kësaj dite, Kolektivi Për Mendim dhe Veprim Feminist ka paralajmëruar mbajtjen e një proteste me thirrjen ku kërkohet që “Vrasja e grave të trajtohet si urgjencë kombëtare”.