Përplasje në Komisionin për Buxhet: Akuza të ndërsjella mes pushtetit dhe opozitës për çmimin e pronave

Procesi i shitjes së pronave nga Agjencia Kosovare e Privatizimit është shndërruar në vatër tensionesh mes ligjvënësve të shumicës parlamentare dhe atyre të opozitës, gjatë mbledhjes së Komisionit për Buxhet. Diskutimet e ashpra u ngritën në momentin kur në rend dite ishte shqyrtimi dhe prezantimi i raportit vjetor financiar të këtij institucioni. Dokumenti financiar i AKP-së u shtrua për diskutim nga kryetari i bordit të Agjencisë, Hekuran Nikqi, duke pasuar menjëherë me debate dhe akuza të ndërsjella ndërmjet deputetëve.