Analisti malazez: Rrëzimi i Vuçiqit nuk e zhduk nacionalizmin serb

Analisti i njohur politik nga Mali i Zi, Ljubomir Filipoviç, ka ngritur alarmin se një ndryshim i mundshëm i udhëheqjes në Serbi nuk nënkupton domosdoshmërisht edhe shkatërrimin e ideologjisë nacionaliste që ka mbështetur regjimin aktual deri më sot. Përmes një postimi në rrjetin social X, Filipoviç ka adresuar kritika të ashpra ndaj pritshmërive të disa qarqeve intelektuale në Serbi, të cilat kërkojnë që gazetarët dhe analistët t'i përshtatin qëndrimet e tyre kritike sipas nevojave të tranzicionit politik të vendit. Sipas tij, para procesit zgjedhor ekzistonin pretendimet se diskutimi i hapur mbi nacionalizmin brenda radhëve të lëvizjes studentore mund të dëmtonte shanset për mposhtjen e Aleksandar Vuçiqit. Ndërkohë, tashmë po ngrihen pretendime të reja se kritikët e tillë kinse po rrezikojnë konsolidimin e një qeverie të ardhshme demokratike. "Deri kur duhet ta shtyjmë kritikën?", ka pyetur retorikisht Filipoviç. Ai ka paralajmëruar se nëse forcat nacionaliste serbe mbijetojnë pas një ndryshimi politik, ato rrezikojnë të fitojnë një legjitimitet të ri demokratik, duke vazhduar të minojnë marrëdhëniet e Serbisë me fqinjët dhe të prodhojnë destabilitet në të gjithë rajonin.