Aktivistja Sijarina paralajmëron radikalizim të protestave: Kërkojmë shkarkimin e dy ministrave dhe drejtësi për Arlinda Zekajn

Aktivistja e “Kolektivit Feminist”, Liridona Sijarina, ka bërë të qartë se protestat për vrasjen e tragjike të Arlinda Zekajt jo vetëm që do të vazhdojnë, por do të njihen edhe me një përshkallëzim të ndjeshëm, derisa të plotësohen kërkesat e drejtuara ndaj Qeverisë dhe organeve të drejtësisë në vend. Gjatë fjalës së saj, Sijarina ka theksuar se rezistenca qytetare nuk do të ndalet as gjatë natës përballë institucioneve shtetërore. Ajo ka akuzuar autoritetet se po përpiqen të hedhin hi syve, duke shtuar se aktivistet nuk do të lejojnë që zëri për mbrojtjen e grave të shtypet apo të përçahet. Sipas saj, ultimatumi tashmë është dorëzuar dhe ajo që pritet tani është një përgjigje konkrete për secilën nga kërkesat e parashtruara. Përveç dënimeve maksimale, aktivistja ka kërkuar llogaridhënie institucionale dhe trajtim me dinjitet të trupave të grave. Duke sjellë në vëmendje statistikat alarmante se brenda më pak se dy muajve janë vrarë katër gra në vend, Sijarina ka refuzuar çdo deklaratë boshe apo kalkulim politik. Ajo e ka cilësuar ngjarjen e fundit si një fyerje të rëndë për shoqërinë dhe vetë viktimën, Arlindën. Kërkesat e përsëritura ndër vite përfshijnë ndjekje penale për kryeprokurorë, kryegjyqtarë, gjyqtarë dhe zyrtarë të Qendrave për Punë Sociale, të cilët, sipas saj, me veprimet apo mosveprimet e tyre kanë çuar në tragjedi. Në lidhje me qëndrimin e Qeverisë së Kosovës, e cila pati deklaruar se viktima nuk ka ditur ku të kërkojë ndihmë, aktivistja ka lëshuar një ultimatum të prerë për shkarkimin e ministrit të Punëve të Brendshme dhe ministres përkatëse, duke paralajmëruar se në të kundërtën protestuesit do t'i detyrojnë institucionet t'i shkarkojnë ata.