Buxheti prej 10 miliardë eurosh: Rama paralajmëron uljen e çmimit të naftës me rreth 35 centë për litër

Kryeministri i Shqipërisë, Edi Rama, ka bërë të ditur një ndryshim rrënjësor në skemën e mbledhjes së taksës së qarkullimit, e cila do të hiqet përfundimisht nga çmimi i naftës për t'u zhvendosur te automjetet. Sipas kreut të qeverisë, kjo lëvizje fiskale do të sjellë një ulje të menjëhershme të çmimit të karburantit në pompë me afërsisht 35 centë për litër. “Do të heqim taksën e qarkullimit nga çmimi i naftës dhe do ta ulim automatikisht 32 lekë në pompë. Ndërkohë që taksën do ta vendosim te makina dhe do ta mbledhim nëpërmjet transportit rrugor. Do të vendosim një taksë qarkullimi, siç e ka Europa, për makinat e huaja që hyjnë në Shqipëri”, u shpreh Rama gjatë një komunikimi publik mbi ecurinë ekonomike dhe mbështetjen për qytetarët. Duke iu drejtuar opinionit publik, Rama theksoi se shifrat e ekonomisë flasin vetë dhe dëshmojnë rritjen e vendit, pavarësisht përpjekjeve për ta zbehur këtë progres. Ai rikujtoi se vetëm pak ditë më parë kishte paralajmëruar masa konkrete lehtësuese për familjet e zakonshme, të cilat tashmë janë mishëruar si vendime zyrtare të qeverisë brenda projektbuxhetit të ri për vitin 2027, i cili tashmë i është përcjellë Kuvendit për shqyrtim dhe miratim. Kryeministri vuri në pah se ekonomia shqiptare vazhdon të jetë ndër më dinamiket në rajon, e karakterizuar nga një ecuri e qëndrueshme dhe rritje e të ardhurave reale për të gjitha shtresat shoqërore. Sipas tij, arritja e pragut prej 30 miliardë eurosh në Prodhimin e Përgjithshëm Kombëtar – nga 10 miliardë euro që ishte një dekadë më parë – dëshmon qartë panoramën pozitive ekonomike të vendit. “Mesazhi im është shumë i qartë, besoj për të gjithë. Ne duam më shumë biznese, më shumë kompani, më shumë investime private, të vogla, të mëdha, vendase dhe të huaj. Ne duam po ashtu sa më shumë njerëz të pasur në Shqipëri, sepse problemi nuk janë asnjëherë të pasurit, është hendeku mes atyre që kanë shumë dhe atyre që kanë shumë pak”, nënvizoi kreu i ekzekutivit, duke rikonfirmuar angazhimin e qeverisë ndaj taksimit të ndershëm ku kush fiton më shumë, kontribuon më shumë për të zbutur pabarazitë sociale. Në fjalën e tij, Rama garantoi se frytet e rritjes ekonomike do të përkthehen çdo vit në mbështetje më të madhe për qytetarët, përmes rritjes së pagave, investimeve dhe shpenzimeve sociale. Ai kujtoi gjithashtu zotimin për dyfishimin e rritjes së pensioneve çdo vit deri në përfundim të mandatit të katërt, duke filluar që nga muaji janar i vitit të ardhshëm. Në përmbyllje të mesazhit të tij, kryeministri theksoi se është plotësisht i ndërgjegjshëm për presionin që rritja e kostos së jetesës, e ushqimeve dhe e karburantit ushtron mbi buxhetin e familjeve të zakonshme shqiptare, ndaj dhe masat e reja buxhetore vijnë si një përgjigje e drejtpërdrejtë ndaj këtyre sfidave.