Debakel historik në shtëpi, Partizani U19 shkatërrohet në Ligën e Rinisë UEFA

Partizani U19 ka regjistruar një paraqitje për t'u harruar në sfidën e parë të turit të dytë të Ligës së Rinisë UEFA, duke u mposhtur rëndë para adhuruesve të vet me rezultatin 0-6 nga skuadra çeke, Hradec Kralove. Ky epilog përbën një surprizë të madhe dhe tejet negative, duke marrë parasysh se para ndeshjes, formacioni kryeqytetas konsiderohej si favorit absolut për fitore, madje edhe nga agjencitë e basteve. Megjithatë, realiteti i shfaqur në fushën e blertë ishte krejtësisht ndryshe nga parashikimet paraprake. Pjesa e parë u mbyll me epërsinë e miqve, ndërsa kthesa vendimtare ndodhi në fillimin e fraksionit të dytë. Nela u ndëshkua me karton të kuq, duke e lënë Partizanin me një lojtar më pak në fushë, rrethanë që solli shpërbërjen e plotë të strukturës mbrojtëse të të kuqve. Në këto kushte, çekët përfituan në maksimum për të thelluar epërsinë deri në shifrat e thella 0-6. Ky rezultat e vë skuadrën shqiptare në një pozitë tejet të vështirë dhe praktikisht mbyll çështjen e kualifikimit për në fazën tjetër të kompeticionit.