Përforcim amerikan për bardheblutë: Charles Belvin zyrtarizohet te skuadra e Tiranës

Klubi i volejbollit Tirana ka zyrtarizuar afrimin e radhës për ekipin e meshkujve, duke siguruar shërbimet e lojtarit amerikan Charles Belvin, i cili i është bashkuar skuadrës kryeqytetase për pjesën e mbetur të sezonit. Përfaqësuesit e klubit bardheblu e kanë bërë publike marrëveshjen përmes një njoftimi zyrtar, ku shprehin entuziazmin për këtë bashkëpunim. “Klubi Sportiv Tirana ka kënaqësinë të mirëpresë lojtarin më të ri të ekipit të volejbollit për meshkuj, Charles Belvin,” thuhet në deklaratën e lëshuar nga drejtuesit e klubit. Sportisti 30-vjeçar nga Shtetet e Bashkuara të Amerikës vjen në rolin e diagonalit, ndërsa pritet që me eksperiencën e tij të gjatë ndërkombëtare t'i japë një hov cilësor lojës së skuadrës nga kryeqyteti. Gjatë rrugëtimit të tij sportiv, Belvin ka mbajtur veshur fanellat e disa ekipeve të ndryshme në glob, duke luajtur në SHBA, Suedi, Mongoli dhe Tajvan, ku përfshihen skuadra si Taoyuan Leopards, SoCal Rising Tide, Örkelljunga Volley dhe LA Blaze, sipas njoftimit të Tiranës.