Kryeministri Rama u përgjigjet protestuesve: Zëri i popullit dëgjohet vetëm përmes votës

Kryeministri i Shqipërisë, Edi Rama, ka reaguar ndaj thirrjeve të protestuesve për largimin e tij nga pushteti, duke theksuar se ata nuk posedojnë asnjë mandat apo autorizim për të folur në emër të qytetarëve, pasi vullneti i tyre shprehet ekskluzivisht përmes votës. Gjatë qëndrimit të tij, kreu i qeverisë e ka quajtur tubimin një “mishmash”, ndërsa ka vënë në shënjestër fjalorin e përdorur nga organizatorët dhe pjesëmarrësit, duke ngritur akuza se ata shkelin çdo normë minimale të komunikimit dhe të dialogut demokratik. “Ky mishmash ka një devizë përbashkuese, ne jemi populli, ne s’e durojmë dot më këtë sistem, s’e duam më këtë qeveri, s’e pranojmë më këtë kryeministër. Jep dorëheqjen, bindju popullit! Ky mishmash s’ka asnjë lidhje me popullin dhe asnjë autorizim për të folur në emër të popullit, sepse populli flet vet me votën e tij. Liria dhe e drejta e tyre, e atyre që duan t’u imponojnë të tjerëve bindjet e tyre, mbaron aty ku nis liria e të tjerëve. Një turmë që në fjalorin e vet bazik s’ka asnjë fije respekti për asnjë standard komunikimi, formë dialogu, apo ballafaqimi”, u shpreh ai. Në përmbyllje të qëndrimit të tij, Edi Rama ka garantuar se do të vazhdojë të ushtrojë funksionet e tij kushtetuese pa u lëkundur, duke theksuar se do të jetë në krye të detyrës deri në ditën e fundit të mandatit të besuar nga qytetarët.