Tragjedia hekurudhore në Spanjë, kryeministri Kurti i dërgon telegram ngushëllimi homologut Sánchez

Kryeministri i Republikës së Kosovës, Albin Kurti, i ka dërguar një mesazh ngushëllimi kreut të Qeverisë spanjolle, Pedro Sánchez, pas aksidentit të rëndë hekurudhor që tronditi Madridin dhe la pas dhjetëra viktima. Nëpërmjet një postimi në rrjetin social X, kreu i ekzekutivit kosovar ka ndarë dhimbjen për këtë ngjarje tragjike. "Thellësisht i pikëlluar nga lajmi për aksidentin hekurudhor në Spanjë, i cili ka marrë dhjetëra jetë njerëzish. Ngushëllimet e mia më të sinqerta i shpreh kryeministrit Pedro Sánchez, familjeve të viktimave dhe popullit të Spanjës në këtë ditë tragjike", ka shkruar Kurti. Si pasojë e përplasjes fatale mes dy trenave me shpejtësi të lartë, është bërë i domosdoshëm pezullimi i qarkullimit në linjën hekurudhore që lidh kryeqytetin spanjoll me rajonin jugor të Andaluzisë, bëhet e ditur nga operatori hekurudhor Adif. Ndërkohë, autoritetet rajonale të Castilla-La Mancha kanë konfirmuar se numri i jetëve të humbura ka arritur në të paktën 64 persona. Autoritetet kompetente vijojnë hetimet për të zbardhur rrethanat e plota dhe shkakun e saktë që çoi në këtë fatkeqësi masive.