Nis misioni evropian: Partizani U-19 kërkon fitoren ndaj çekëve të Hradec Kralove

Skuadra e të rinjve të Partizanit do të zbresë fushë sot për të luajtur ndeshjen e parë të turit të dytë kualifikues në UEFA Youth League, ku do të matë forcat me Hradec Kralove. Takimi mes dy formacioneve është planifikuar të nisë në orën 14:00 dhe do të zhvillohet në ambientet e “Shtëpisë së Futbollit”. Në prag të kësaj sfide të rëndësishme në terren vendas, bastbërësit i japin epërsi skuadrës kryeqytetase, e cila drejtohet nga trajneri Fatjon Muhameti, duke e konsideruar favorite përballë kampionëve të Çekisë. Vlen të theksohet se “Demat e kuq” siguruan kualifikimin për në këtë fazë pasi arritën të eliminonin më herët ekipin nga Malta, Valetën. Sa i përket aspektit teknik dhe organikës së lojtarëve, stafi teknik i Partizanit U-19 do të duhet të bëjë llogaritë pa shërbimet e Frensi Malit. Lojtari do të mungojë me siguri, pasi është i pezulluar për shkak të ndëshkimit me karton të kuq në ndeshjen e mëparshme. Partizani U-19, që mban kurorën e kampionit në fuqi të Shqipërisë, ka përpara një rrugëtim prej tre turesh që duhet t'i kalojë me sukses për të siguruar biletën për në fazën e grupeve të këtij kompeticioni prestigjioz.