Zajkova kërkon veprime konkrete: Mjaft më me fjalë boshe, reformat nuk mund të presin më

Vendi ynë nuk ka më nevojë për fushata parazgjedhore dhe premtime boshe lidhur me të ardhmen evropiane, por kërkon hapa të prekshëm, lidership të fortë dhe gatishmëri reale për transformim. Sipas kryetares së Partisë Liberal Demokrate (PLD), Monika Zajkova, është koha që institucionet tona të ndalojnë së prituri udhëzime të pafundme nga Brukseli dhe të marrin fatin në duart e tyre, veçanërisht kur bëhet fjalë për përmirësimin e sistemit të drejtësisë dhe përshtatjen e kuadrit ligjor. Gjatë një paraqitjeje televizive në RTVM, Zajkova vuri në dukje se pavarësisht hapave para në fushën e digjitalizimit, këto arritje mbeten të zbehta pa një reflektim të njëkohshëm dhe thelbësor në drejtësi. Ajo bëri thirrje për masa të menjëhershme, duke përfshirë zgjidhje të qarta legjislative, debate konstruktive për forcimin e politikave penale dhe zgjatjen e afateve të vjetërsimit për veprat e ndryshme penale. “Ajo që më shqetëson vërtet është se për një kohë shumë të gjatë mendoj se Maqedonia ka qëndruar në dhomën e pritjes dhe ka pritur që progresi të vijë nga diku tjetër, dhe ne nuk kemi ndërmarrë iniciativa të caktuara. Pikërisht për këtë arsye PLD-ja propozoi opsionin e vonesës së zbatimit të ndryshimeve kushtetuese. Klauzolat e vetëmbrojtjes që shohim sot, dhe vetë Europa tashmë po na japin mësime se si duhet të futen ato, në rastin e Malit të Zi, a nuk thotë se nëse Mali i Zi nuk mund të ofrojë garanci, atëherë ne do të futim klauzolat e vetëmbrojtjes. Pse të mos i ndjekë Maqedonia këto shembuj?”, u shpreh ajo. Në këtë linjë, kryetarja e PLD-së tërhoqi vërejtjen se skena politike e brendshme duhet të tregojë pjekuri kur bëhet fjalë për diplomacinë dhe mbrojtjen e interesave kombëtare jashtë kufijve. Edhe pse pluralizmi dhe divergjencat e mendimeve janë shtylla të demokracisë, ato kurrsesi nuk duhet të cenojnë përgjegjësinë e përbashkët shtetërore në arenën ndërkombëtare.