Revolucion në shëndetësi: Mbërrijnë në QKUK protezat e para të gjurit, nis decentralizimi i listave të pritjes

Klinika e Ortopedisë në Qendrën Klinike Universitare të Kosovës (QKUK) ka pranuar kontingjentin e parë të protezave të gjurit, duke shënuar kështu nisjen zyrtare të këtij procesi jetik për pacientët. Ky furnizim i ri ka për qëllim direkt ngritjen e cilësisë dhe lehtësimin e qasjes së qytetarëve në shërbimet ortopedike, sidomos për ata që presin ndërhyrje për vendosjen e protezave të gjurit. “Ka arritur kontingjenti i parë i protezave të gjurit në Klinikën e Ortopedisë në Qendrën Klinike Universitare të Kosovës (QKUK), duke shënuar fillimin e realizimit të këtij procesi dhe një hap të rëndësishëm drejt përmirësimit të qasjes së pacientëve në shërbimet ortopedike,” thuhet në njoftimin zyrtar. Sipas një bashkëpunimi të ngushtë me Ministrinë e Shëndetësisë, tashmë ka filluar edhe faza e decentralizimit të listave të pritjes për ndërhyrjet e protezave të gjurit dhe të kokërdhokullës. Qëllimi kryesor është shpërndarja e rasteve në mënyrë të drejtë dhe proporcionale mes QKUK-së dhe spitaleve të përgjithshme rajonale, duke u bazuar në kapacitetet dhe mundësitë reale të trajtimit. Ky organizim i ri synon të shkurtojë listat e gjata të pritjes, të rrisë efiçencën e kujdesit shëndetësor dhe t'u ofrojë pacientëve mundësinë e trajtimit sa më afër vendbanimeve të tyre, duke shmangur kështu dyndjen e të gjitha rasteve vetëm në QKUK. Nëpërmjet këtij hapi, institucionet shëndetësore vlerësojnë se po ecet sigurt drejt një sistemi më të qasshëm, më efikas dhe të orientuar tërësisht nga nevojat e qytetarëve.