Maqedoni: Bien shifrat e të miturve në konflikt me ligjin, por shtohen rastet e fëmijëve viktimat

Gjatë vitit 2025, gjithsej 1.201 të mitur kanë pasur probleme me ligjin dhe janë shoqëruar në stacionet policore. Kjo shifër dëshmon një ulje prej 45 fëmijësh ose katër përqind më pak krahasuar me vitin 2024, periudhë gjatë së cilës u regjistruan 1.246 fëmijë. Këto të dhëna bëhen të ditura në Raportin Vjetor mbi Situatën në Fushën e të Drejtave të Fëmijëve dhe Delikuencës së të Miturve, dokument ky i përpiluar nga Këshilli Shtetëror për Parandalimin e Delikuencës së të Miturve dhe Drejtësinë për Fëmijë. Ky raport ofron një analizë të detajuar të gjendjes gjatë vitit 2025, duke u mbështetur në 40 tregues specifikë dhe informacione të dorëzuara nga 87 institucione të ndryshme. Këta tregues janë përditësuar dhe përshtatur plotësisht me dispozitat e reja të Ligjit për Drejtësinë për Fëmijë. Sipas dokumentit, tkurrja prej 50 përqind e numrit të fëmijëve në zonë rreziku gjatë vitit 2025 është rezultat i ndryshimit të metodologjisë. Në vend të grup-moshës nga gjashtë deri në 18 vjeç, kategoria aktuale përfshin vetëm fëmijët deri në 14 vjeç, ndërkohë që është krijuar një tregues më vete për grupmoshën 14 deri në 18 vjeç. Pikërisht për këtë arsye, statistikat pasqyrojnë gjithashtu një rënie të numrit të vajzave që ndodhen në rrezik. Statistikat tregojnë se numri më i lartë i fëmijëve viktima është evidentuar pranë Ministrisë së Punëve të Brendshme me 694 raste, ndjekur nga zyrat e prokurorive publike me 629 raste, gjykatat me 404 raste dhe qendrat për punë sociale me 334 raste. Rritja më e ndjeshme, e cila kap shifrën e 118 përqindëshit në raport me vitin 2024, është shënuar pikërisht në institucionet gjyqësore. Lidhur me vajzat e paraqitura në stacionet e policisë, pjesa dërrmuese e tyre janë paraqitur në cilësinë e dëshmitareve, gjithsej 107 raste, ndërsa 61 vajza u thirrën në bazë të denoncimeve, duke përbërë kështu 21 përqind të totalit të përgjithshëm. Nga ana tjetër, Këshilli ka evidentuar një rritje prej 54 përqind të numrit të fëmijëve që kanë kryer kundërvajtje krahasuar me vitin 2024, ndonëse krahasuar me vitin 2023 vërehet një rënie prej 31 përqind. Sa i përket të miturve të ndaluar gjatë vitit 2025, numri i tyre ka pësuar rënie me 50 përqind kundrejt vitit të kaluar kur u regjistruan 149 fëmijë të ndaluar, por mbetet më i lartë nëse krahasohet me vitin 2023, kur ishin ndaluar 50 fëmijë.