Çështja e transportuesve, Nikolloski: Ende mungon një zgjidhje zyrtare dhe e unifikuar nga Bashkimi Evropian

Zëvendëskryeministri dhe njëkohësisht ministër i Transportit, Aleksandar Nikolloski, ka bërë të ditur se deri më tani janë ndërmarrë dy hapa konkretë për lehtësimin e punës së shoferëve profesionistë. Sipas tij, në strategjinë e re të vizave për zonën Shengen, shoferët tashmë trajtohen si profesionistë e jo si turistë, ndërsa janë arritur edhe marrëveshje dypalëshe me shtete të veçanta të kësaj hapësire për lëshimin e vizave afatgjata. Këto deklarata Nikolloski i bëri gjatë fjalës së tij në një panel diskutimi në kuadër të “Forumit Global të Tregtisë dhe Rritjes 2026”, ngjarje kjo e organizuar nga Oda Zvicerane e Tregtisë e Maqedonisë. Ai shtoi se, pavarësisht këtyre përpjekjeve, shoferët profesionistë nga vendi vazhdojnë të përballen me kufizimet ekzistuese, duke u trajtuar ende si vizitorë të zakonshëm dhe duke iu nënshtruar rregullit që nuk lejon qëndrim më të gjatë se 90 ditë brenda një periudhe 180-ditore. “Ne kemi bërë përpjekje të vazhdueshme për të siguruar një zgjidhje të përbashkët për të gjithë rajonin e Ballkanit Perëndimor në bashkëpunim me zonën Shengen, por fatkeqësisht, Brukseli ende nuk ka ofruar një vendim përfundimtar”, u shpreh ai. Në fjalën e tij, ministri vuri në dukje se situata aktuale dëshmon qartë se në këtë drejtim mungon një vizion dhe qasje e mirëorganizuar nga ana e strukturave evropiane.